Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 541 Hüküm no: 411 Orijinal metin no: [99a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un oğlu Murad’a verdiği borcu ispatlayamadığı Mahmiye-i İstanbul’da Haraccı Kara Mehmed mahallesinde sâkine ve zâtı ta‘rîf-i şer‘î ile mu‘arrefe olan Saliha Hatun bt. Abdullah meclis-i şer‘de kebîr oğlu işbu râfi‘ü’l-kitâb el-Hâc İsmail b. el-Hâc Murad mahzarında üzerine da‘vâ ve takrîr-i kelâm edip târîh-i kitâbdan dört sene mukaddem oğlum mezbûr el-Hâc İsmail a‘mâl içün kendi malımdan altı yüz guruş verip ol dahi ahz u kabz etmiş idi. El-hâletü hâzihi meblağ-ı merkūm altı yüz guruşu taleb eylediğimde bana teslîmden imtinâ‘ eder suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda ityân-ı beyyineden ızhâr-ı acz edip ve yemîne dahi tâlibe olmamağla müdde‘iye-i mezbûre bilâ-beyyine mezbûr el-Hâc İsmail’e bî-vech mu‘ârazadan men‘ birle mâ-vaka‘a bi’t-taleb kayd şüd. Hurrire fî 14 min-Rebî‘i’l-âhir li-sene aşer ve mi’e ve elf. Şuhûdü’l-hâl: Rûşenî Mehmed Efendi, el-imâm Mehmed Efendi b. Mehmed, Kara Mehmed b. Hüseyin, es-Seyyid Abdülmuti Efendi ve gayruhum mine’l-huzzâr