Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 543 Hüküm no: 413 Orijinal metin no: [99b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ümmügülsüm’ün varisi olmadığından terekesinin beytülmâle ait olduğu Mahmiye-i İstanbul’da Peykhâne kurbünde Emin Sinan mahallesinde sâkine iken bundan akdem vefât eden Ümmügülsüm Hatun bt. Abdullah b. Abdullah’ın mu‘takı Çerkes Ömer b. Abdullah’ın mu‘takı, merhûm Muslu Ağa b. Bayram’ın kebîr oğlu ve min-ciheti’l-velâ hasren vârisleri olduğunu iddi‘â eden işbu râfi‘ü’l-kitâb fahrü’l-a‘yân Ahmed Bey asâleten ve sagīr oğulları Abdullah Bey ve Abdurrahman Bey’in vasiyy-i şer‘îleri Ali Efendi b. Bayezid b. Abdülgani tarafından müseccel vekîli Hasan Efendi b. Osman vekâleten meclis-i şer‘de müteveffât-ı mezbûrenin zâhirde vâris-i ma‘rûfu olmayıp terekesi cânib-i beytülmâle âid olmak zu‘muyla Mahmiye-i mezbûrede bi’l-fi‘il beytülmâl emîni fahrü’l-akrân Mustafa Ağa b. Abdurrahman b. Abdülmennan tarafından müseccel vekîl ve kıbel-i şer‘den ber-vech-i âtî husûmet ve redd-i cevâba me’zûn olmağla terekesine bi’l-vekâle vaz‘-ı yed eden Mehmed Çelebi b. Mustafa mahzarında her biri üzerine da‘vâ ve takrîr-i kelâm edip müteveffât-ı mezbûrenin mu‘takı merkūm Çerkes Ömer’i Kırım sâkinlerinden Şahpolat nâm kimesne bin seksen yedi târîhinde babam müteveffâ-yı mezbûr Muslu Ağa’ya ihdâ ve îsâl edip abd-ı mevhûb-ı memlûkü oldukda bin doksan üç senesinde mezbûr Ömer’i babam müteveffâ-yı mezbûr hasbeten lillâhi’l-melik içün huzûr-ı Müslimînde malından [100a] i‘tâk ettikden sonra mezbûr Ömer dahi şirâen mezbûre Ümmügülsüm’e malik ba‘dehû mezbûre Ümmügülsüm malından i‘tâk etmekle bi-hasebi’l-velâ müteveffât-ı mezbûrenin verâseti bize münhasıra iken vekîl-i merkūm bi-gayr-ı hakkın vaz‘-ı yed edip bize teslîmden imtinâ‘ eder suâl olunsun dedikde gıbbe’s-suâl ve’l-inkâr zikr olunan müdde‘îlerden müdde‘âlarına beyyine taleb olundukda udûl-ı Müslimînden mahmiye-i mezbûrede Karaki Hüseyin Çelebi mahallesi sâkinlerinden Ali Bey b. Abdullah ve Mehmed Bey b. Ahmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Çerkes Ömer vech-i meşrûh üzere müteveffâ-yı merkūm Muslu Ağa b. Bayram’ın mülk-i mevhûbu olup ba‘dehû bin doksan üç senesinde mezbûr Çerkes Ömer’i müteveffâ-yı mezbûr Muslu Ağa hasbeten lillâh huzûrumuzda malından tahrîr ve i‘tâk ettikden sonra merkūm Ömer dahi şirâen merkūme Ümmügülsüm’e malik oldukdan sonra merkūme Ümmügülsüm’ü i‘tâk eyledi, müteveffât-ı mezbûrenin bi-hasebi’l-velâ zikr olunan müdde‘iyûndan gayrı vâris ve terekesine müstahıkk-ı âhar olduğu ma‘lûmumuz değildir, biz bu husûsa bu vech üzere şâhidleriz ve şehâdet dahi ederiz deyü her biri edâ-i şehâdet-i şer‘iyye edip gıbbe’t-ta‘dîl ve’t-tezkiye şehâdetleri makbûle oldukdan sonra mûcebiyle ba‘de’l-hükm vekîl-i mezbûrun terekeden kasr-ı yedine tenbîh birle mâ-vaka‘a bi’t-taleb kayd şüd. Hurrire fî 21 min-Rebî‘i’l-âhir li-sene aşer ve mi’e ve elf. Şuhûdü’l-hâl: es-Seyyid Abdülmuti Efendi reisülküttâb, Uşşâkī Mehmed Efendi, Rûşenî Mehmed Efendi, Yahya Efendi b. Mustafa, Şeyhzâde Ahmed Efendi, Süleyman Ağa b. Ahmed, Ahmed Bey b. Mehmed, Osman Efendi el-Gürcü tâbi‘-i Hergeci Ali Efendi, İslâm Bey, el-Hâc Hüseyin b. Abdullah