Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 544 Hüküm no: 414 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçıbaşı Ali’nin öldükten sonra İsmihan Hatun’a para verilmesini vasiyet ettiği Mahmiye-i İstanbul’da Altıboğça mahallesi ahâlîsinden olup Mısr-ı Kāhire’de bundan akdem vefât eden Aşçıbaşı el-Hâc Ali b. Hasan’ın verâseti zevceteyn-i metrûketeyni Havva Hatun bt. Mehmed ve Hadîce Hatun bt. Abdullah ile sulbî kebîr oğlu Mehmed ve sulbiye sagīre kızı Emetullah’a münhasıra olduğu şer‘an mütehakkık oldukdan sonra müteveffâ-yı mezbûrun ümm-i veledi olup zâtı mahalle-i mezbûre ahâlîsinden İmâm Sinan Efendi b. Mehmed ve Osman Çelebi b. Ömer ta‘rîfleriyle mu‘arrefe olan bâ‘isetü’l-kitâb İsmihan bt. Abdullah nâm hatun meclis-i şer‘de sagīre-i mezbûre Emetullah’ın ammi ve savb-ı şer‘den mansûb vasîsi olan el-Hâc Ömer b. Hasan ile mezbûretân Havva ve Hadîce mahzarlarında üzerlerine da‘vâ ve takrîr-i kelâm edip seyyidim müteveffâ-yı mezbûr Aşçıbaşı el-Hâc Ali b. Hasan hâl-i kemâl-i sıhhatinde târîh-i fevtinden dört buçuk sene mukaddem Mısr-ı Kāhire’ye gider oldukda ben bi-emrillâhi te‘âlâ kazâ-i mezbûrda fevt olursam benim içün ümm-i veledim İsmihan’a sülüs-i malımdan yüz guruş verile deyü huzûr-ı Müslimînde vasiyet edip musırran-aleyh vefât etmeğin malının sülüsü dahi meblağ-ı mezbûra müsâ‘id olup vasiyy-i merkūm ile mezbûretân Hadîce ve Havva bana teslîmden imtinâ‘ ederler suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline muvâfık beyyine taleb olundukda udûl-ı ahrâr-ı ricâl-i Müslimînden mu‘arrifân-ı mezbûrân Sinan Efendi b. Mehmed ve Osman Çelebi b. Ömer li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr el-Hâc Ali b. Hasan hâl-i kemâl-i sıhhatinde târîh-i fevtinden dört buçuk sene mukaddem Mısr-ı Kāhire’ye gider oldukda ben bi-emrillâhi te‘âlâ kazâ-i mezbûrede fevt olursam işbu müdde‘iye-i merkūme için, ümm-i veledim İsmihan’a sülüs-i malımdan yüz guruş verile deyü huzûrumuzda vasiyet edip musırran-aleyh vefât eyledi ve malının sülüsü dahi meblağ-ı mezbûr yüz guruşa vâfidir, biz bu husûsa bu vech üzere şâhidleriz ve şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olup mûcebiyle ba‘de’l-hükm mâ-vaka‘a bi’t-taleb kayd şüd. Fî 20 min-Rebî‘ülâhir sene 1110. Şuhûdü’l-hâl: Mehmed Efendi b. Mahmud, Hasan Çelebi b. Abdullah, Ahmed Çelebi b. Hüseyin, İbrahim Çelebi b. Mehmed, Nasuh b. Çukadâr