Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 547 Hüküm no: 416 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin terekesini elinde bulunduran Şerife ile diğer varisler arasında sulh bedeli karşılığı anlaşma sağlandığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den irsâl olunan Mevlânâ Şerif Mehmed Efendi mahmiye-i İstanbul’da Ekşi Karadut mahallesinde vâki‘ es-Seyyid Ali Efendi’nin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Muhsine Hatun mahallesinde sâkin iken bundan akdem vefât eden es-Seyyid Hüseyin Çelebi b. Mehmed Çavuş’un verâseti zevce-i menkûha-i metrûkesi Şerife Hatun bt. Mustafa ve li-ebeveyn ammi oğulları es-Seyyid el-Hâc Mehmed ve es-Seyyid Ahmed ve es-Seyyid Osman ve es-Seyyid Ömer’e münhasıra olup ve tashîh-i meselesi on altı sehmden olmağla sihâm-ı mezbûrenin dört sehmi mezbûre Şerife Emine Hatun’a ve üçer sehmi mezbûrûndan her birine isâbeti tahakkukundan sonra mezbûr es-Seyyid el-Hâc Mehmed ve es-Seyyid Ahmed ve es-Seyyid Osman kendi asâleten ve karındaşı mezbûr es-Seyyid Ömer tarafından vekâleten meclis-i ma‘kūd-ı mezbûrda tereke-i müteveffâ-yı mezbûra vâzı‘u’l-yed olan mezbûre Şerife Emine Hatun mahzarında ikrâr-ı tâm ve takrîr-i kelâm edip mûrisimiz müteveffâ-yı mezbûr es-Seyyid Hüseyin mülkünü terekesinden tashîh-i mezbûr üzere her birimize isâbet eden üçer sehm hisselerimizi mezbûre Şerife Emine Hatun’dan taleb ve da‘vâ eylediğimizde beynimize muslihûn [tavassut] edip da‘vâ-yı mezkûrdan bizi mezbûre Şerife ile iki yüz on altı guruş üzerine inşâ-i akd-i sulh eylediklerinde biz dahi sulh-ı mezbûru ba‘de’l-kabûl ve bedel-i sulh olan meblağ-ı mezbûrun elli guruşunu mezbûre Şerife Hatun’dan ahz u kabz ve bâkī yüz altmış guruşun yüz elli guruşu mukābelesinde mezbûre Şerife Emine Hatun’un icâreteyn-i ma‘lûmeteyn ile taht ve tasarrufunda olup zikr olunan Muhsine Hatun mahallesinde vâki‘ bir tarafdan Osman Bey menzili ve bir tarafdan Ahmed Çelebi mülkü ve bir tarafdan el-Hâc Hasan mülkü ve bir tarafdan tarîk-i âm ile mahdûd ve hâricen ve dâhilen büyût-ı adîdeyi müştemil Cağaloğlu Vakfı’ndan bir kıt‘a vakıf menzil ma‘rifet-i mütevellî ile bize ferâğ ve tefvîz biz dahi tefevvüz ve kabûl edip bâkī kalan on altı guruşu müteveffâ-yı mezbûrun medyûnu olan Aşçı İbrahim nâm kimesne yedine bi-tarîkı’l-havâle kabûl eyledik min-ba‘d tereke-i müteveffâ-yı mezbûra müte‘allıka âmme-i de‘âvî ve münâza‘ât ve eymân ve muhâsamâtdan mezbûre Şerife Emine Hatun’un deynini ibrâ-i âmm-ı katı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Mehmed Çelebi b. Hüseyin ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb kayd şüd. Fî 11 min-Rebî‘ülâhir sene 1110. Şuhûdü’l-hâl: es-Seyyid Ali Efendi b. es-Seyyid Abdullah, Mehmed Efendi b. Mehmed el-imâm, Osman Efendi b. Ali, Ömer Ağa b. Hacı, Abdullah b. Abdullah, Attâr Mustafa b. Ramazan, Yusuf Çelebi b. Abdullah