Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 549 Hüküm no: 418 Orijinal metin no: [100b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’in eşi Saliha’nın terekeden bir şey saklamadığı Mahmiye-i İstanbul’da Saray-ı cedîd-i sultânî tabbâhlarından olup mahmiye-i mezbûrede Karaki Hüseyin Çelebi mahallesinde sâkin iken bundan akdem vefât eden el-Hâc Mehmed b. Muslu b. Abdullah’ın zâhirde zevce-i menkûha-i metrûkesi Saliha Hatun bt. Ahmed’den gayrı vâris-i ma‘rûfu olmayıp terekesinin rub‘u mezbûre Saliha Hatun’a ve selâse-i erbâ‘ı cânib-i beytülmâle âid olduğu şer‘an zâhir ve mütehakkık oldukdan sonra saray-ı mezbûrda Ser-tabbâhân-ı hâssa olup tâife-i mezbûreden bilâ-vâris fevt olanların terekelerini kabza bâ-hatt-ı hümâyûn-ı şevket-makrûn memûr olan fahrü’l-akrân Selim Ağa b. Kasım b. Abdurrahman tarafından husûs-ı âti’l-beyânda vekîl-i müsecceli ve kıbel-i şer‘den husûmet ve redd-i cevâba me’zûn olmağla tereke-i müteveffâ-yı mezbûra vaz‘-ı yedi muhakkak olan el-Hâc İbrahim b. Ebubekir meclis-i şer‘de mezbûre Saliha Hatun mahzarında üzerine da‘vâ ve takrîr-i kelâm edip müteveffâ-yı mezbûrun terekesinden olup hâric ez-defter mecmû‘u on bin akçe kıymetli bir döşek ve üç yemenî yorgan ve dört çatma Bursa yasdığı ve üç yemenî yasdık ve bir kebe ve üç kilim ve bir sarı velense ve bir köhne kebe ve beş beyâz beylik çuka ve bir çift tüfenk ve iki çuval ve iki çift üzengi ve iki gaddâre ve bir tas ve bir tencere ve bir sini ve bir güğüm ve iki el ibriği ve iki kahve ibriği ve bir fânus ve bir kahve kutusu ve bir tuç havan ve iki şam‘dân ve bir balta ve bir maşasını mezbûre Saliha Hatun ketm ve ihfâ etmişdir, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden ızhâr-ı acz edip istihlâf etmeğin eşyâ-i muharrere-i mezbûreyi ketm ü ihfâ etmeyip üzerine redd ü zamândan bir nesne lâzım gelmediğine mezbûre Saliha Hatun’a yemîn teklîf olundukda ol dahi ber-vefki’l-mesûl yemîn billâhi’l-aliyyi’l-a‘lâ ettikden sonra müdde‘î-i mezbûr el-Hâc İbrahim husûs-ı mezbûra müte‘allık bilâ-beyyine mu‘ârazadan men‘ birle mâ-vaka‘a bi’t-taleb ketb şüd. [101a] Fi’l-yevmi’l-hâmis ve’l-ışrîn min-şehri Rebî‘i’l-âhir li-sene aşer ve mi’e ve elf. Şuhûdü’l-hâl: es-Seyyid Mustafa Efendi b. es-Seyyid Cafer, Rûşenî Mehmed Efendi b. İbrahim, Yahya Efendi b. Mustafa, Şeyhzâde Mehmed Efendi, Süleyman Efendi b. Şeyhzâde Mehmed Efendi, Ahmed Efendi b. Şeyhzâde Mehmed Efendi