Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 555 Hüküm no: 423 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun’un vefatından sonra vasiyetini yerine getirmek üzere Ahmed Efendi’yi vasi tayin ettiği Kezâlik şer‘-i şerîf ettikde müteveffât-ı mezbûrenin vech-i âtî üzere vasiyy-i muhtârı olduğunu iddi‘â eden Ahmed Efendi b. Osman meclis-i ma‘kūd-ı mezbûrda müteveffât-ı mezbûrenin kız kardeşi olup kasaba-i Kasımpaşa’da Kulaksız mahallesinde sâkine olup zâtı mahalle-i mezbûre ahâlîsinden Ahmed Efendi b. Mehmed ve Ahmed Beşe b. Mahmud ta‘rîfleriyle mu‘arrefe olan Fâtıma bt. Ahmed Efendi mahzarında üzerine da‘vâ takrîr-i kelâm edip müteveffât-ı mezbûre Ümmühani Hatun bt. Mahmud b. Mustafa fevtinden yirmi gün mukaddem bi-emrillâhi te‘âlâ fevt olduğumda sen cemî‘ terekemi ahz u kabz ve semen-i misli ile bey‘ ve kabz-ı semen ve semenlerinden evvelâ vech-i mesnûn üzere levâzım-ı techîz ve tekfînim gördükden sonra bâkī malımın sülüsü ifrâz olunup sülüs-i mezbûr ile ıskāt-ı salât ve hukūk-ı ibâd ve kefâret-i savmım görüle ve eyyâm-ı mübârekede tabh-ı ta‘âm ve it‘âm-ı fukarâ ve sulehâ oluna ve fazla kalırsa miskîn-i râhî ve mukarrebîn ile sâir vücûh-ı birre ve hayra sarf oluna ve malımın sülüsânı li-ebeveyn karındaşım ve hasren vârisem olup zikr olunan Kulaksız mahallesinde sâkine Saliha [Safiye] Hatun ibneti’l-merhûm Mahmud’a teslîm oluna deyü vasiyet ve tenfîzine beni huzûr-ı Müslimînde vasiyy-i muhtâr nasb ü ta‘yîn edip ben dahi muvâcehesinde kabûl ve musırraten-aleyhâ fevt oldukda mezbûre Fâtıma Hatun yedinde müteveffât-ı mezbûrenin vedî‘i olan eşyâsını kabz ve tenfîz-i vesâyâ murâd eylediğimde mezbûre bana eşyâ-i mûdi‘asını teslîmden imtinâ‘ eder suâl olunsun dedikde mezbûre Fâtıma cevâbında müteveffât-ı mezbûrenin kendi yedinde vedî‘a olduğunu ikrâr lâkin müdde‘iye-i mezbûrenin vech-i meşrûh üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Hadîka-i hâssa-i şehriyârî kapılarından Demirkapı bekçisi Ahmed Efendi b. Ali ve zikr olunan Dâye Hatun mahallesinde İmâm Abdullah Efendi b. Abdullah li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffât-ı mezbûre Ümmühani Hatun bt. Mahmud b. Mustafa fevtinden yirmi gün mukaddem bi-emrillâhi te‘âlâ fevt olduğumda cemî‘ terekemi sen ahz u kabz ve semen-i misilleri ile bey‘ ve kabz-ı semen ve semenlerinden evvelâ vech-i mesnûn üzere levâzım-ı techîz ve tekfînim gördükden sonra bâkī malımın sülüsü ifrâz olunup sülüs-i mezbûr ile ıskāt-ı salât ve hukūk-ı ibâd ve kefâret-i savmım görüle ve eyyâm-ı mübârekede tabh-ı ta‘âm ve it‘âm-ı sulehâ ve fukarâ oluna ve fazla kalırsa miskîn-i râhî ve mukarrebîn ile sâir vücûh-ı birre ve hayra harc ü sarf oluna ve malımın sülüsânı li-ebeveyn kız karındaşım ve hasren vârisem olup zikr olunan Kulaksız mahallesinde sâkine Safiye Hatun’a teslîm oluna deyü vasiyet edip ve tenfîzine işbu müdde‘î-i mezbûr Ahmed Efendi b. Osman’ı huzûrumuzda vasiyy-i muhtâr nasb ü ta‘yîn ol dahi muvâcehesinde ba‘de’l-kabûl musırraten-aleyhâ vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle oldukdan sonra mûcebince ba‘de’l-hükm müdde‘î-i mezbûr yine meclis-i ma‘kūd-ı mezbûrda mezbûre Fâtıma Hatun mahzarında ikrâr ve takrîr-i kelâm edip mezbûre yedinde vedî‘a olup ânifen edâsına hükm-i şer‘î lâhık olan ber-mûceb-i defter-i müteveffât-ı mezbûreyi eşyâ-i terekeden olmak üzere tamâmen bi’l-vesâye ahz u kabz eyledim min-ba‘d mezbûre Fâtıma yedinde bir şeyim kalmadı dedikde gıbbe’t-tasdîkı’ş-şer‘î vâki‘ hâli ilâ-âhirihî. Şuhûdü’s-sâbikūn