Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 562 Hüküm no: 428 Orijinal metin no: [103a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölmüş olan Karabet’in hanında mevcut olan malların yine ölmüş olan Duğenci’ye ait olduğu Husûs-ı âti’l-beyânın mahallinde istimâ‘ ve tahrîri içün kıbel-i şer‘-i enverden ba‘s olunan Mevlânâ Ali Rıfat b. Yusuf mahmiye-i İstanbul’da Şeyh Ferhad mahallesinde sâkin iken bundan akdem düyûnu terekesinden ezyed olduğu halde hâlik olan Duğenci nâm zimmînin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm eyledikde hâlik-i merkūmun beyne’l-guremâ husûmet ve redd-i cevâba vasiyy-i şer‘îsi olan bâ‘isü’s-sifr Şahin v. Kosta meclis-i ma‘kūd-ı mezkûrda yine hâlik-i merkūm Duğenci zimmînin dâmâdı olup düyûnu terekesinden ezyed olduğu halde hâlik olan Karabet v. Sakar’ın kezâlik beyne’l-guremâ husûmet ve redd-i cevâba vasiyy-i şer‘îsi olan Danyel v. Agbal nâm zimmî mahzarında üzerine da‘vâ ve takrîr-i kelâm [edip] hâlik-i evvel merkūm Duğenci v. Damod’un tereke-i kāsırasından olup yedimde olan defter-i kassâm nâtık olduğu üzere bin sekiz yüz akçe kıymetli üç sarı yekmerdî ve iki bin sekiz yüz akçe kıymetli sekiz alaca fağfûr tabak ve bin beş yüz akçe kıymetli dört yekmerdî ve altı bin akçe kıymetli on beş fağfûrî kebîr tabak ve üç yüz akçe kıymetli iki kâse ve bin altı yüz akçe kıymetli bir yaldızlı fener ve dört bin sekiz yüz akçe kıymetli iki kaliçe ve yedi bin iki yüz akçe kıymetli hurda incili bir tîrkeş ve bin iki yüz akçe kıymetli sekiz fağfûrî fincan ve iki bin akçe kıymetli bir Acem mendili ve yedi bin iki yüz akçe kıymetli on yedi aded mertebânî tabak ve dört bin akçe kıymetli dört paşa fincan ve bin beş yüz akçe kıymetli dört fağfûrî yekmerdî ve altı yüz akçe kıymetli iki alaca yekmerdî ve beş yüz akçe kıymetli bir sarı tabak ve sekiz bin iki yüz akçe kıymetli kırmızı sakız sâyebânı ve hâric ez-defter on bin akçe kıymetli zirâ‘ı beynimizde ma‘lûm çadır bezi ve iki Cezâyir yanı vedî‘aten hâlik-i merkūm Karabet’in Vâlidehanı’nda olan mahzeninde mevcûd olmak ile vasiyy-i merkūm Danyel hâlik-i mesfûr Karabet’in terekesinden olmak zu‘muyla vaz‘-ı yed etmek murâd eder, suâl olunup kasr-ı yedine tenbîh olunmak matlûbumdur dedikde gıbbe’s-suâl vasiyy-i mezbûr cevâbında eşyâ-i merkūme-i mezbûreye vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda beynlerinde udûl-ı ricâlden mahalle-i mezbûre sükkânından Arotin v. Serkiz ve Agob v. Roroş li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müdde‘î-i mezbûr Şahin v. Kosta bâlâda zikr olunan eşyâ-i merkūme-i mezbûreyi merkūm Karabet v. Sakar v. Hüdaverdi vedî‘a tarîkı üzere bizim huzûrumuzda def‘ ü teslîm eyledi, biz bu husûsa bu vech üzere şâhidleriz ve şehâdet dahi ederiz deyü her biri edâ-i şehâdet-i şer‘iyye ettiklerinde ba‘de-ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan İbrahim Çelebi b. Ahmed ve el-Hâc Süleyman b. Hasan meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd şüd. Fî 15 Rebî‘ülâhir sene 1110. Şuhûdü’l-hâl: Ali Efendi b. Yusuf, Süleyman Çelebi b. Ahmed, Mustafa Beşe b. Ahmed, Ahmed Çelebi b. Musa, Hasan Bey b. Ali, Hoca Ohan v. Tokoş, Agob v. Rosel, Arton v. Serkiz, Tokoş v. Bedros, Murad v. Anaştaş