Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 566 Hüküm no: 434 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cemile Hatun’un vefatıyla oğlu İbrahim üzerine babası Mehmed Çelebi’nin vasi tayin edildiği Mahmiye-i İstanbul’da Sarı Demirci mahallesinde sâkine iken bundan akdem vefât eden Cemile Hatun bt. Abdullah’ın sagīr oğlu İbrahim’in mal-ı müntakilini hıfza ve tesviye-i umûruna kıbel-i şer‘den bir vasî nasb ü ta‘yîn olunmak lâzım ve mühim olmağın emânet ve diyânet ile mevsûf ve vesâyet uhdesinden gelmeye kādir idiği zeyl-i vesîkada muharrerü’l-esâmî Müslimîn haberleri ile lede’ş-şer‘ zâhir olan sagīr-i mezbûrun babası ve velîsi işbu râfi‘ü’l-kitâb Mehmed Çelebi b. Ahmed’i hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i [umûruna] vakt-i rüşd ü sedâdına varınca vasî nasb ü ta‘yîn buyurduklarından sonra vasiyy-i mezbûr Mehmed Çelebi talebiyle mal-ı müntakil-i sagīr-i mezbûrdan târîh-i kitâbdan yevmî birer para nafaka farz ve takdîr buyurup meblağ-ı mefrûz-ı mezbûru levâzım-ı sagīr-i mezbûra harc ü sarfa ve lede’l-hâce istidâneye ve rucû‘unda sagīr-i mezbûr malına rucû‘a vasiyy-i mezbûra izin verilmeğin mâ-vaka‘a kayd şüd. Hurrire fî 26 min-Rebî‘ülâhir sene 1110. Şuhûdü’l-hâl: Mehmed b. Mustafa el-attâr, Ali Çelebi b. (°) el-bakkāl, Sarı Mehmed Beşe pazarcı, Mehmed Beşe pazarcı, Mehmed Beşe b. Hasan