Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 567 Hüküm no: 435 Orijinal metin no: [104a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb b. Abdullah’ın vefatıyla çocukları üzerine vasi ve onların üzerine de nazır tayin edilmesi Yoros kazâsına tâbi‘ Kavak Hisarı mustahfızı iken bundan akdem Hama’da müsâfiren sâkin iken vefât eden Eyüb b. Abdullah’ın sagīr oğlu Abdullah ve sagīre kızı Hadîce’nin tesviye-i umûruna kıbel-i şer‘den bir vasî nasb ü ta‘yîn olunmak lâzım ve mühim olmağın emânet [ve] istikāmet ile mevsûfe idiği zeyl-i vesîkada muharrerü’l-esâmî Müslimîn haberleri ile lede’ş-şer‘ zâhir olan sagīrân-ı mezbûrânın cedde-i sahîhaları râfi‘atü’l-kitâb Emine Hatun bt. Hüsnü hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri tesviye-i umûr-ı sagīrîn-i mezbûrûna vakt-i rüşd ü sedâdlarına varınca vasiye, üzerine hâlâ Kavak Hisarı Ustası Mehmed Ağa b. Mehmed Efendi ile sagīrân-ı mezbûrânın vâlideleri Havva Hatun bt. Mahmud’u hasbî nâzır nasb ü ta‘yîn buyurduklarında onlar dahi vesâyet ve nezâret-i mezbûru ba‘de’l-kabûl merâsimini edâya ta‘ahhüd ve iltizâm etmeğin mâ-vaka‘a kayd şüd. Hurrire fî 25 min-şehri Rebî‘i’l-âhir li-sene aşer ve mi’e ve elf. Şuhûdü’l-hâl: İbrahim Efendi b. Hasan, Mustafa Efendi b. Mehmed el-imâm, Süleyman Beşe b. Mehmed, Mustafa b. Mustafa, Mustafa b. Receb, Osman b. Ebubekir, Osman Beşe b. (°), Mehmed b. İshak, Mehmed b. Mahmud