Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 567 Hüküm no: 436 Orijinal metin no: [104a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin vefatıyla oğlu Mehmed’e nafaka takdiri İstinye nâhiyesine tâbi‘ Yeni Hisar’da topçu iken bundan akdem vefât eden İbrahim Beşe b. Hüseyin’in oğlu Mehmed nâm sagīrin tesviye-i umûruna bâ-hüccet-i şer‘iyye vasiyy-i muhtârı olan zikr olunan Yeni Hisar’da sâkin bâ‘isü’l-kitâb Ahmed Beşe b. Mehmed meclis-i şer‘de bi’l-vesâye takrîr-i kelâm edip vasîsi olduğum sagīr-i mezbûrun nafaka ve kisveye eşedd-i ihtiyâc ile muhtâc olmağın babası müteveffâ-yı mezbûrdan müntakil malından kadr-ı kifâye nafaka farz ve takdîr olunmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbık olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri mal-ı müntakil-i sagīr-i mezbûrdan târîh-i kitâbdan yevmî birer para nafaka ve kisve-bahâ farz ve takdîr edip meblağ-ı mefrûz-ı mezbûru levâzım-ı sagīr-i mezbûra harc ü sarfa ve inde’z-zarûre istidâne ve lede’z-zafer malına rücû‘a vasiyy-i mezbûra izin vermeğin mâ-vaka‘a bi’t-taleb ketb şüd. Hurrire fî 25 min-Rebî‘ülâhir sene 1110. Şuhûdü’l-hâl: İbrahim Efendi b. Hasan, el-Hâc Abdurrahman b. Mustafa, el-Hâc Mustafa b. Mehmed, Pazârî Mustafa, Hasan b. Abdullah, Kara Mehmed Beşe b. Hüseyin, Ahmed b. Süleyman, İbrahim b. Mehmed