Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 569 Hüküm no: 438 Orijinal metin no: [104b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vasisi Hatice’de birikmiş olan kırk bin akçenin sağ akçeye dönüştürüldüğü Husûs-ı âti’l-beyânın mahallinde ketb ü tahrîri iltimâs olunmağın kıbel-i şer‘den me’zûn Mevlânâ Uşşâkī Mehmed Efendi irsâl olunup ol dahi mahmiye-i İstanbul’da Ayasofya kurbünde Hasan Ağa mahallesinde sâkin es-Seyyid İbrahim Çelebi b. es-Seyyid Abdülmuttalib’in menziline varıp zeyl-i vesîkada mektûbü’l-esâmî Müslimîn huzûrlarında akd-i meclis-i şer‘-i nebevî eylediğinde mahmiye-i mezbûrede Akbıyık mahallesinde sâkin iken bundan akdem vefât eden el-Hâc Ahmed b. el-Hâc İbrahim’in sagīr oğlu Mustafa’nın vasiye-i mansûbesi ve menzil-i mezbûrda sâkine olan zâtı ma‘rifet-i şer‘iyye ile ârifân Murtaza Ağa b. Hüseyin ve Mustafa Beşe b. Ahmed ta‘rîfleriyle mu‘arrefe olan Hadîce bt. Bali nâm hatun meclis-i ma‘kūd-ı mezbûrda hâlâ zevci bâ‘isü’l-vesîka mezbûr es-Seyyid İbrahim Çelebi mahzarında ikrâr ve takrîr-i kelâm edip vasiyesi olduğum sagīr-i mezbûrun mal-ı müntakilinden makbûzum olan kırk bin akçe mütekarrer olmağla tebdîl içün bundan esbak mezbûr es-Seyyid İbrahim Çelebi’ye vermiş idim. El-hâletü hâzihi zikr olunan mütekarreri mezbûr es-Seyyid İbrahim Çelebi sağ akçeye tebdîl ettikden sonra meblağ-ı merkūmun yüz altmış guruşunu benim emrim ile sagīr-i mezbûrun hıtânı levâzımına ve hocasına ve îdiye iştirâ olunan libâsına ve kurbânına harc ü sarf edip yedinde bâkī kalan yüz yetmiş üç guruş ve bir sülüs guruşu dahi işbu mahalde bana def‘ ve teslîm ben dahi yedinden ahz u kabz eyledim min-ba‘d meblağ-ı merkūmdan yedinde ve zimmetinde bir akçe bâkī kalmadı dedikde gıbbe’t-tasdîkı’ş-şer‘î vâki‘ hâlî mevlânâ-yı mezbûr mahallinde ketb ü tahrîr ba‘dehû ma‘an mürsel Yusuf b. Abdullah ile mahall-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb kayd şüd. Fî 2 min-Cumâdelûlâ sene 1110. Şuhûdü’l-hâl: Mustafa Efendi b. Ali el-imâm, Mehmed Çelebi b. Şa‘bân, Mustafa Beşe b. Şa‘bân, Mehmed Çelebi b. Hızır, el-Hâc Mehmed b. Habib, Mehmed Ağa b. Mehmed