Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 570 Hüküm no: 440 Orijinal metin no: [104b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin sahibi olduğu evin yarısını eşi Fatıma Hatun’a sattığı Hilâl-i sutûrda mastûr husûsun mahallinde tahrîri içün cânib-i şer‘-i hatîrden bi’l-iltimâs ba‘s olunan Mevlânâ Yahya Efendi Dârü’l-hilâfeti’l-aliyye Kostantıniyyetü’l-mahmiye mahallâtından Kasab Timurhan mahallesinde sâkin Mehmed Efendi b. el-merhûm Veliyüddin Efendi’nin menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf ettikde müşârün-ileyh Mehmed Efendi meclis-i ma‘kūd-ı mezkûrda zevce-i menkûhası olup zâtı mahalle-i mezbûre sükkânından el-Hâc Ali b. Abdullah ve Ömer Ağa b. Mustafa ma‘rifetleriyle mu‘arrefe olan hâfızatü’l-kitâb fahrü’l-muhadderât Fâtıma Hatun bt. Ramazan mahzarında ikrâr ve takrîr-i kelâm edip mahalle-i mezbûrede vâki‘ arsası merhûm Kasab Timurhan Vakfı’ndan olup ebniyesi yedimde mülküm olan bir tarafdan Hadîce Hatun bt. el-merhûm Mustafa Efendi menziline ve bir tarafdan Hasan Efendi b. Ali menziline ve bir tarafdan el-Hâc Ali b. Abdullah menziline ve bir tarafdan tarîk-i âmma müntehî fevkānî bir bâb oda ve bir sofa ve tahtında bir bâb oda ve bir matbah ve bir mağsel ve dehliz ve kenîf ve zât-ı eşcâr cüneyneyi hâvî menzilin ebniye-i memlûke-i mezbûrenin nısf-ı şâyi‘ini cümle tevâbi‘ ve levâhık ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile zevcem mezbûre Fâtıma Hatun’a yüz yetmiş guruşa bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl edip ve arsa-i mahdûde-i mezkûrenin nısf-ı şâyi‘ini ma‘rifet-i mütevellî ve bedel-i misli olan otuz guruşa mezbûre Fâtıma Hatun’a ferâğ ve tefvîz ol dahi tefevvüz ve kabûl ettikden sonra semen-i mezbûr ile bedel-i mezbûr cem‘an iki yüz guruşun elli guruşunu mezbûre Fâtıma Hatun’un [105a] zimmetinde mütekarrer mehrine ve elli guruşu dahi mukaddemâ yedinden istikrâz eylediğim elli guruş ki cem‘an yüz guruş deynim olmağla meblağ-ı mezbûrun yüz guruşuna takas ol dahi mukāssa ve kabûl edip ve yüz guruşu dahi zevcem mezbûre Fâtıma Hatun yedinden alıp kabz eyledim ba‘de’l-yevm menzil-i mezbûrun ebniyesinin nısf-ı şâyi‘i zevcem mezbûrenin mülk-i müşterâsı ve arsa-i mezbûrenin dahi nısf-ı şâyi‘i hakk-ı tefvîzidir keyfe mâ teşâ mutasarrıf olsun dedikde gıbbe’t-tasdîkı’ş-şer‘î vâki‘ hâli ba‘de’l-ihbâr bi’t-taleb kayd olundu. Fî 7 min-Saferi’l-hayr sene 1110. Şuhûdü’l-hâl: Hasan Efendi b. Ali, el-Hâc Musa b. Hüseyin, Mustafa b. Mehmed, el-Hâc Abdullah b. Şa‘bân