Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 571 Hüküm no: 441 Orijinal metin no: [105a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Mehmed’in evini oğlu Mehmed Çelebi’ye sattığı Mahmiye-i İstanbul’da Saraç İshak Bey mahallesinde sâkine Saliha bt. Mehmed Çavuş b. Halil nâm hatun tarafından husûs-ı âti’l-beyânda vekîl olduğunu zâtını ma‘rifet-i şer‘iyye ile ârifân İmâm Halil Efendi b. Abdurrahman ve Müezzin Hasan Efendi b. Mehmed şehâdetleriyle şer‘an sâbit olan Ahmed Bey b. Süleyman meclis-i şer‘de müvekkile-i mezbûrenin sadrî oğlu işbu bâ‘isü’l-kitâb Mehmed Çelebi b. Ömer mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Saliha Hatun silk-i mülkünde münselik olup mahalle-i mezbûrede vâki‘ bir tarafdan Berber Mustafa Çelebi veresesi mülkü ve bir tarafdan Medîne-i münevvere Vakfı’ndan Na‘lbûr el-Hâc Mustafa’nın veresesi menzilleri ve bir tarafdan Tabbâhân-ı hâssadan el-Hâc Mustafa Bey mülkü ve bir tarafdan tarîk-i âmma mahdûd iki fevkānî oda ve tahtında su kuyusu ve havluyu müştemil mülk menzilini cemî‘ tasarrufâtı bâkıye olduğu halde bi-cümleti’t-tevâbi‘ ve’l-levâhık bey‘-i bâtt-ı sahîh-i şer‘î ile oğlu mezbûr Mehmed Çelebi’ye yüz altmış guruşa bey‘ ve temlîk ve teslîm ol dahi iştirâ ve kabûl ve tesellüm ettikden sonra semeni olan meblağ-ı mezbûr yüz altmış guruş mutâlebesinden mezbûr Mehmed Çelebi’nin zimmetini ibrâ-i âm ve katı‘u’n-nizâ‘la ibrâ ve ıskāt eyledi min-ba‘d menzil-i mahdûd-ı mezbûr müşteri-yi mezbûrun mülk-i müşterâsı ve hakk-ı sarfı olmuşdur, keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb kayd şüd. Hurrire fî gurre-i min-Cumâdelûlâ li-sene aşer ve mi’e ve elf. Şuhûdü’l-hâl: Abdullah Efendi b. Ahmed el-hatîb, Süleyman Çelebi b. İbrahim, el-Hâc Veli b. Mehmed, Mahmud Çelebi b. Mehmed, Hüseyin Çelebi b. Mehmed, Ahmed Çelebi b. İbrahim