Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 582 Hüküm no: 453 Orijinal metin no: [107b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Cebeci Mehmed Beşe’nin eşi Fatıma Hatun’un terekeden alacak hakkı olduğu Husûs-ı âti’l-beyânın mahallinde istimâ‘ ve tahrîri iltimâs olunmağla savb-ı şer‘den me’zûnen ba‘s olunan Mevlânâ Mehmed Efendi b. Hüseyin mahmiye-i İstanbul’da el-Hâc İlyas mahallesinde sâkin düyûnu terekesinden ezyed olduğu halde bundan akdem vefât eden Cebeci Mehmed Beşe b. Receb b. Kaya’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî eyledikde müteveffâ-yı mezbûrun zevce-i menkûha-i metrûkesi olup zâtı Ebubekir Efendi b. Sefer ve Mustafa Çelebi b. Ebubekir ta‘rîfleriyle mu‘arrefe olan işbu bâ‘isü’l-kitâb Fâtıma Hatun bt. Hasan meclis-i ma‘kūd-ı mezbûrda müteveffâ-yı mezbûrun veresesi terekesinden kasr-ı yed etmekle tesviye-i umûru içün kıbel-i şer‘den vasî ve kayyım nasb ü ta‘yîn olunmağla terekesine vâzı‘u’l-yed olan Mehmed Ağa b. Ali mahzarında üzerine da‘vâ ve takrîr-i kelâm edip zevcim müteveffâ-yı mezbûr Cebeci Mehmed Beşe b. Receb b. Kaya zimmetinde mütekarrer ve ma‘kūdun-aleyh para üç akçe hesâbınca elli bin altı yüz akçe ve cihet-i karz-ı şer‘îden beş bin dört yüz akçe ki min-haysü’l-mecmû‘ on iki bin akçe hakkım olup hattâ müteveffâ-yı mezbûr hâl-i kemâl-i sıhhatinde fevtinden iki ay mukaddem huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden Mustafa b. Hasan ve diğer Mustafa Beşe b. Hasan li-ecli’ş-şehâde meclis-i ma‘kūd-ı mezbûra li-ecli’ş-şehâde hâzırân olup isre’l-istişhâd fi’l-vâki‘ müteveffâ-yı mezbûr Cebeci Mehmed Beşe b. Receb b. Kaya fevtinden iki ay mukaddem zevcesi işbu müdde‘iye-i mezbûre Fâtıma Hatun bt. Hasan zimmetinde mütekarrer ve ma‘kūdun-aleyh olan para üç akçe hesâbınca iki bin altı yüz akçe ve cihet-i karzdan beş bin dört yüz akçe ki min-haysü’l-mecmû‘ on iki bin akçe zimmetinde lâzımü’l-edâ deyni olduğunu bizim huzûrumuzda ikrâr ve işhâd eyledi, biz bu bu husûsa bu vech üzere şâhidleriz ve şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra gıbbe’t-tahlîfi’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hüseyin b. Mehmed ve Hüseyin b. Hasan ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fî 25 min-Rebî‘i’l-evvel li-sene aşer ve mi’e ve elf. Şuhûdü’l-hâl: Hasan Beşe b. Ömer, İvaz Beşe b. Abdullah, Mustafa Beşe b. Hasan, Hüseyin Beşe b. Mehmed, Mustafa b. Halil, Ahmed b. Süleyman