Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 583 Hüküm no: 454 Orijinal metin no: [107b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın bazı eşya ücretinden vefat eden Cebeci Mehmed Beşe’de alacağı olduğu Kezâlik <> mahrûse-i Galata’da Tütüncüzâde mahallesinde sâkin bâ‘isü’l-kitâb el-Hâc Mustafa b. Abdullah meclis-i ma‘kūd-ı mezkûrda müteveffâ-yı mezbûrun veresesi terekesinden kasr-ı yed etmekle tesviye-i umûru içün kıbel-i şer‘den vasî ve kayyım nasb olunan Mehmed Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr Cebeci Mehmed Beşe b. Receb b. Kaya zimmetinde olan cins ve zirâ‘ı beynimizde ilm-i şer‘î ile ma‘lûm yedimden müşterâ ve makbûz Londrine çuka semeninden on bir buçuk guruş ve tüfenk?-i Kudüs semeninden bir guruş ve bir rub‘ bir çift küpe semeninden beş guruş ve bir beyâz kaftan semeninden iki guruş ve bir rub‘ ve nakid beş guruş ki min-haysü’l-mecmû‘ yirmi beş guruş zimmetinde vâcibü’l-edâ bana deyni olduğunu huzûr-ı Müslimîn’de ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahrûse-i mezbûre kasabâtından kasaba-i Kasımpaşa’da el-Hâc Hasan mahallesinde sâkin Hasan Beşe b. Abdullah ve Salih Beşe b. Bayram li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr Cebeci Mehmed Beşe b. Receb b. Kaya hâl-i kemâl-i sıhhatinde işbu müdde‘î-i mezbûr el-Hâc Mustafa b. Abdullah’a zimmetinde vâcibü’l-edâ yirmi beş guruş deynim vardır deyü huzûrumuzda ikrâr ve bizi işhâd eyledi, biz bu husûsa ilâ-âhirihî. Şâhidûnü’s-sâbikūn