Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 584 Hüküm no: 455 Orijinal metin no: [107b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Murad’ın vefat eden Cebeci Mehmed Beşe’de gulâm ücretinden alacağı olduğu Kezâlik mahmiye-i mezbûrede Esir Hanı’nda sâkin bâ‘isü’l-kitâb el-Hâc Yusuf b. Murad meclis-i ma‘kūd-ı mezbûrda müteveffâ-yı mezbûrun veresesi terekesinden kasr-ı yed etmekle tesviye-i umûru içün kıbel-i şer‘den vasî ve kayyım nasb olmağla terekesine vâzı‘u’l-yed olan Mehmed Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr Cebeci Mehmed Beşe b. Receb b. Kaya zimmetinde hayâtında yedinden müşterâ ve kabz ve istihlâk eylediği vasfı beynimizde ma‘lûm Rusiyyü’l-asl bir re’s gulâm semeninden yüz yirmi beş guruş hakkım olup hattâ müteveffâ-yı mezbûr hâl-i kemâl-i sıhhatinde cihet-i mezbûreden bana ol kadar guruş deyni olduğunu huzûr-ı Müslimînde ikrâr ve işhâd eyledikden sonra kable’l-edâ fevt olmağla hâlâ terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden han-ı mezbûrda sâkin el-Hâc Mehmed b. Abdurrahman ve Osman Beşe b. Ali li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Cebeci Mehmed Beşe b. Receb b. Kaya işbu müdde‘î-i mezbûr el-Hâc Yusuf b. Murad yedinden iştirâ ve kabz ve istihlâk eylediği vasfı beynlerinde ma‘lûm Rusiyyü’l-asl bir re’s gulâm semeninden yüz yirmi beş guruş zimmetinde edâsı lâzım deyni olduğunu hâl-i kemâl-i sıhhatinde huzûrumuzda ikrâr ve bizi işhâd eyledi, bu husûsa ilâ-âhirihî. Şâhidûnü’s-sâbikūn