Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 591 Hüküm no: 461 Orijinal metin no: [108b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin varislerinin alacaklarını tahsil için Ahmed ve Mehmed Çelebi’yi vekil tayin ettikleri Mahmiye-i İstanbul’da Yazıcı mahallesinde sâkin iken bundan akdem vefât eden Mustafa Çelebi b. Siyavuş’un verâseti zevce-i menkûha-i metrûkesi Hadîce bt. Abdullah ile sagīre kızı Âişe ve vâlidesi İsmihan bt. Abdullah ve li-ebeveyn er karındaşı İsmail’e münhasıra olup tashîh-i meselesi yirmi dört sehmden olmağla sihâm-ı mezbûrenin üç sehmi zevcesi mezbûre Hadîce’ye ve on iki sehmi kızı sagīre mezbûre Âişe’ye ve dört sehmi vâlidesi mezbûre İsmihan’a ve bâkī dört sehmi mezbûr İsmail’e isâbet eyledikden sonra mezbûr Hadîce bt. Abdullah ba‘de’t-ta‘rîfi’ş-şer‘î asâleten ve sagīre-i mezbûrenin vasiyy-i mansûbu olmağla ve mezbûre İsmihan bt. Abdullah ba‘de’t-ta‘rîf meclis-i şer‘de yine Mahmiye-i mezbûre sükkânından olup mezbûreler tarafından husûs-ı âtî ahz u kabzı ve kendülere îsâle müseccel vekîlleri olan Ahmed Çelebi b. Halil ve Mehmed Çelebi b. Durmuş mahzarında her biri ikrâr ve takrîr-i kelâm edip müteveffâ-yı mezbûrun zimem-i nâsda olan hukūkunu ahz u kabz ve bize îsâle mezbûr Ahmed Çelebi b. Halil ve Mehmed Çelebi b. Durmuş’u tarafımızdan vekîl edip târîh-i kitâba gelince mezbûrânın cem‘ ü tahsîl eyledikleri yüz kırk beş guruş bi-kadri’l-hısâs tereke-i müteveffâ-yı mezbûrdan olmak üzere bi’t-tamâm mezbûrân Ahmed Çelebi ve Mehmed Çelebi yedlerinden ahz u kabz edip husûs-ı mezbûra müte‘allıka da‘vâdan mezbûrânın zimmetlerini her birimiz ibrâ ve ıskāt eyledik dediklerinde gıbbe’t-tasdîk kayd şüd. Fî 6 min-Cumâdelevvel sene 1110. Şuhûdü’l-hâl: Mehmed Efendi b. Mustafa, Uşşâkī Mehmed Efendi, Çukadâr Süleyman Beşe, Murad Efendi