Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 591 Hüküm no: 462 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un cariyesi Nergis’i azat ettiği Husûs-ı âti’l-beyânın mahallinde tahrîri iltimâs olunmağın savb-ı şer‘den me’zûnen Mevlânâ Velizâde Mehmed Efendi irsâl olunup ol dahi mahmiye-i İstanbul’da Altımermer’de Kâtib Muslihiddin mahallesinde sâkine Hadîce Hatun bt. Abdülmennan’ın menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i nebevî eyledikde mezbûre Hadîce bt. Abdülmennan b. Abdullah’ın zevci ve tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahmiye-i mezbûrede Eski İmâret Mescid-i şerîfinde imâm olan el-Hâc Mustafa Efendi b. Mehmed ve Mustafa b. Abdullah şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan zevci es-Seyyid Mehmed Ağa b. es-Seyyid Ali meclis-i ma‘kūd-ı mezbûrda bi’l-vekâle ikrâr ve takrîr-i kelâm edip zevcem müvekkile-i mezbûre Hadîce Hatun’a rıkk-ı sâbıkını mu‘terife işbu uzun boylu, kara kaşlı, Gürciyyetü’l-asl, Müslimetü’l-millet, hâfızatü’l-kitâb Nergiz bt. Abdullah nâm câriyesini hasbeten lillâhi’l-aliyyi’l-a‘lâ ve taleben li-merzâti Rabbihi’l-mevlâ malından tahrîr ve i‘tâk ve zümre-i harâir-i asliyât silkine idrâc ve ilhâk eyledi, ba‘de’l-yevm mezbûre Nergiz üzerinde müvekkile-i mezbûre Hadîce’nin hakk-ı velâdan gayrı alâka ve medhali kalmamışdır dedikde vâki‘ hâli mevlânâ-yı mezbûr mahallinde kayd ve tahrîr ba‘dehû ma‘an mürsel Hasan Çelebi b. Abdullah ve Mehmed b. Ahmed ile meclis-i şer‘de inhâ ve takrîr etmeğin mâ-vaka‘a kayd şüd. Hurrire fî gurreti min-Rebî‘ülevvel sene 1110. Şuhûdü’l-hâl: Suyolcu el-Hâc Hasan Ağa, el-Hâc Ömer b. Mehmed, el-Hâc İbrahim el-attâr, Süleyman Çelebi b. Bezzâz Sinan, İbrahim Efendi b. Salih