Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 603 Hüküm no: 471 Orijinal metin no: [111a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa’nın vefat eden Sarraf Beşir’de gulâm ve cariye ücretinden alacağı olduğu Kezâlik cânib-i beytülmâle âid oldukdan sonra Mahmiye-i mezbûrede Soğan Ağa mahallesinde sâkin bâ‘isü’l-kitâb Süleyman Ağa b. Mustafa meclis-i ma‘kūd-ı mezbûrda yeniçeri beytülmâl emîni olan Hüseyin Ağa b. Muslu mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Beşir b. Abdullah b. Abdullah zimmetinde hayâtında yedimden iştirâ ve kabz ve istihlâk eylediği vasf ve cinsleri beynimizde ma‘lûm bir [r]e’s gulâm ve iki re’s câriye semenlerinden beş yüz guruş hakkım olup hattâ fevtinden bir gün mukaddem hâl-i marazında ikrâr ve işhâd ettikden sonra kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı Müslimînden zikr olunan Tülbentci Hüsam mahallesinde sâkin el-Hâc İsmail b. Mustafa ve Mahmiye-i mezbûrede Muhsine Hatun mahallesinde sâkin Halil b. İbrahim ve mahrûse-i Galata mevâki‘inden kasaba-i Tophane’de Kādirîler Tekyesi kurbünde sâkin Ahmed Efendi b. Ömer li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Sarrâf el-Hâc Beşir b. Abdullah b. Abdullah hâl-i marazında fevtinden bir gün mukaddem işbu müdde‘î-i mezbûr Süleyman Ağa yedinden iştirâ ve kabz ve istihlâk eylediği vasf ve cinsleri beynlerinde ma‘lûm bir re’s gulâm ve iki re’s câriye semenlerinden beş yüz guruş zimmetinde edâsı lâzım deyni olduğunu bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb kayd şüd. Hurrire fi’t-târîhi’l-mezbûr, li-seneti’l-mezbûre. Şâhidûnü’s-sâbikūn