Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 603 Hüküm no: 472 Orijinal metin no: [111b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın Derviş’i azat ettiği <> Husûs-ı âti’z-zikrin mahallinde tahrîri içün cânib-i şer‘-i mutahhardan bi’t-taleb meb‘ûs Mevlânâ Yahya Efendi b. el-merhûm Mustafa Efendi Mahmiye-i İstanbul’da Kasab Timurhan mahallesinde fahrü’l-muhadderât Âişe Hanım bt. el-merhûm Ahmed Paşa b. Mustafa Paşa’nın sâkine olduğu menzile varıp zeyl-i kitâbda mastûrü’l-esâmî Müslimîn huzûrlarında akd-i meclis-i şer‘-i şerîf ettikde müşârün-ileyhâ Âişe Hanım bt. el-merhûm el-mezbûr Ahmed Paşa b. el-merhûm el-mezbûr Mustafa Paşa tarafından husûs-ı âti’l-beyânda müseccel vekîli olan el-Hâc Ali b. Mustafa meclis-i ma‘kūd-ı mezbûrda açık kaşlı, mühür gözlü, uzun boylu, Gürciyyü’l-asl, Müslimü’l-millet, hâfızü’l-kitâb Derviş b. Abdullah mahzarında bi’l-vekâle ikrâr ve takrîr-i kelâm edip müvekkilim mezbûre Âişe Hanım abd-ı memlûk-i mevsûf-ı mezbûr Derviş’i hasbeten lillâhi te‘âlâ malından tahrîr ve i‘tâk ve silk-i ahrâr-ı asliyyîne idrâc ve ilhâk eyledi, ba‘de’l-yevm mevsûf-ı mezbûr Derviş sâir ahrâr-ı asliyyîn gibi hür olmuşdur dedikde vâki‘ hâli mevlânâ-yı mezbûr mahallinde tahrîr ba‘dehû Ahmed b. Süleyman ile meclis-i şer‘a gelip inhâ ve takrîr etmeğin mâ-vaka‘a bi’t-taleb ketb olundu. Fî gurre-i Cumâdelûlâ li-sene aşer ve mi’e ve elf. Şuhûdü’l-hâl: Veliyüddin Efendi b. Mehmed, el-Hâc Mehmed b. Hasan, Abdullah Çelebi b. el-Hâc Mustafa, Mustafa Çelebi b. Abdullah, Mehmed b. Mustafa, Ali Efendi b. Mustafa, İbrahim b. Hasan