Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 604 Hüküm no: 473 Orijinal metin no: [111b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Efendi’den kalan eşya ve menzil hissesinin sahibi sadece eşi Feta Hatun olduğundan varislerin bunlarda hakkı olmadığı Mahmiye-i İstanbul’da Balatkapısı dâhilinde Molla Aşkī mahallesinde sâkin iken bundan akdem vefât eden el-Hâc Mustafa Efendi b. Hüseyin Efendi b. eş-Şeyh Mehmed Efendi’nin verâseti zevce-i menkûhası Feta Hatun bt. Abdulkadir’e ve oğlu İbrahim Çelebi ve firâşından hâsıl zevce-i mezbûre Feta Hatun’un batnında mütebeyyen hamle münhasıra oldukdan sonra mezbûr İbrahim Çelebi meclis-i şer‘de zâtı mahalle-i mezbûre imâmı Yusuf Efendi b. Abdullah ve Osman Beşe b. Abdullah ta‘rîfleriyle mu‘arrefe olan hâfızatü’l-kitâb vâlidesi mezbûre Feta Hatun mahzarında üzerine da‘vâ ve takrîr-i kelâm edip babam müteveffâ-yı mezbûrun terekesinden olup vâlidem mezbûre Feta Hatun yedinde olup mecmû‘u yetmiş guruş kıymetli bir seccâde ve köhne orta keçe ve iki yan keçe ve iki penbe minder ve dört beledî yasdık ve üç sahan ve bir fağfûrî kâse ve bir leğen ve bir ibrik ve bir küçük güğüm ve bir hoşâb tası ve bir küçük kazgan ve iki tencere ve bir kapak ve beledî döşek, üç yemenî yorgan ve bir sîm akreb sâ‘at ve bir hamam peşkiri ile mahalle-i mezbûrede vâki‘ bir tarafdan ba‘zan Abdüllatif Efendi Vakfı olan menzil ve ba‘zan Kör Ali veresesi mülkleri ve bir tarafdan Üzümcü Ali Vakfı olan menzil ve bir tarafdan Mustafa Beşe veresesi mülkleri ve bir tarafdan tarîk-i âmma müntehî fevkānî iki oda ve tahtânî bir oda ve üç sofa ve bir tahta-pûşuna ve bir su kuyusu ve bir matbah ve bir fırın ve bir kenîf ve eşcâr-ı müsmire ve gayr-ı müsmire bahçeyi müştemil menzilin Abdüllatif Efendi Vakfı olan menzil tarafından nısfını mîrâsa idhâlinden imtinâ‘ eder suâl olunsun dedikde gıbbe’s-suâl mezbûre Feta Hatun cevâbında zevcim müteveffâ-yı mezbûr eş-Şeyh Mustafa Efendi b. eş-Şeyh Hüseyin Efendi b. eş-Şeyh Mehmed Efendi hâl-i kemâl-i sıhhatinde zevcem mezbûre Feta Hatun yedinde olan eşyâ-i mezbûrede kat‘an alâka ve medhalim yokdur ve işbu yedimde olan bin yüz on şehr-i Rebî‘ülevveli târîhiyle müverraha Balat Nâibi Seyyid Mehmed Efendi imzâ ve hatmiyle mümzât ve mahtûme hüccet-i şer‘iyye mûcebince menzil-i mahdûd-ı mezbûrun Abdüllatif Efendi Vakfı olan menzil tarafından nısfını ba‘de’l-ifrâz ve alâmât-ı fâsıla vaz‘ olundukdan sonra bana iki yüz guruşa huzûr-ı Müslimînde bey‘ ve teslîm ben dahi iştirâ ve tesellüm ve kabz edip ba‘dehû semeni olan meblağ-ı mezbûr iki yüz guruşu, zimmetinde cihet-i deyn-i şer‘îden bana iki yüz guruş deyni olan hakkıma takas ettikde ben dahi mukāssa ve kabûl etmekle nısf-ı menzil-i mahdûd-ı mezbûr mülk-i müşterâm ve eşyâ-i mezbûre mülk-i mahzım olmuşdur deyü def‘le mukābele ve istintâk olunsun dedikde gıbbe’l-istintâk ve’l-inkâr müdde‘iye-i mezbûreden def‘-i meşrûhuna beyyine taleb olundukda udûl-ı Müslimînden mu‘arrifân-ı merkūmân İmâm Yusuf Efendi b. Abdullah ve Osman b. İsmail li-ecli’ş-şehâde mahfil-i kazâya hâzırân olup istişhâd olundukda fi’l-vâki‘ müteveffâ-yı mezbûr eş-Şeyh Mustafa Efendi b. eş-Şeyh Hüseyin Efendi b. eş-Şeyh Mehmed Efendi hâl-i kemâl-i sıhhatinde işbu zevcesi Feta Hatun bt. Abdulkadir yedinde olan eşyâ-i mezbûrede kat‘an alâka ve medhalim yokdur ve menzil-i mahdûd-ı mezkûrun Abdüllatif Efendi Vakfı olan menzil tarafından nısfı ba‘de’l-ifrâz ve alâmât-ı fâsıla vaz‘ olundukdan sonra iki yüz guruşa mezbûre Feta Hatun’a hâl-i kemâl-i sıhhatinde huzûrumuzda bey‘ ve teslîm ol dahi iştirâ ve tesellüm ve kabz edip ba‘dehû semeni olan meblağ-ı merkūmu zimmetinde cihet-i merkūmeden mezbûre Feta Hatun’a iki yüz guruşa takas ol dahi mukāssa ve kabûl eyledi, menzil-i mezbûr mezbûre Feta Hatun’un mülk-i müşterâsı ve eşyâ-i mezbûre mülk-i mahzı olmuşdur, keyfe mâ teşâ ve tehtâr mutasarrıf olsun dedikde gıbbe’t-tasdîk [112a] işbu hüccet-i şer‘iyyemi müdde‘iye-i mezbûrenin yedine def‘ eyledi ve mazmûn-ı hüccete bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd şüd. Selh-i Rebî‘ülâhir li-sene aşer ve mi’e ve elf. Şuhûdü’l-hâl: Abdurrahman Efendi b. Ahmed Efendi, Abdurrahman Efendi b. Mehmed Efendi, eş-Şeyh Mehmed Efendi b. el-Hâc Sunullah, İbrahim Ağa b. Mehmed Ağa, Mustafa Efendi b. Hasan