Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 606 Hüküm no: 475 Orijinal metin no: [112a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Keresteci Ali’nin varislerinin Mustafa b. Ali’deki alacak davasından vazgeçtikleri Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘den me’zûnen irsâl olunan Mevlânâ Velizâde Mehmed Efendi b. Veliyüddin mahmiye-i İstanbul’da Kantarcılar kurbünde Dökmeci el-Hâc Mustafa Ağa b. el-Hâc Ali’nin kârhânesine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde mahmiye-i mezbûrede Hoca Halil Attâr mahallesinde sâkin iken bundan akdem vefât eden Keresteci el-Hâc Ali b. İbrahim’in verâseti zevce-i menkûha-i metrûkesi Râbia Hatun bt. İbrahim ve sagīr oğlu Salih ve kebîr oğlu Süleyman Çelebi’ye münhasıra ve tashîh-i meselesi on altı sehmden olmağla sihâm-ı mezbûrenin iki sehmi mezbûre Râbia’ya ve bâkī on dört sehmin yedişer sehmi oğulları mezbûrlardan herbirine isâbeti tahakkukundan sonra mezbûr Süleyman asâleten ve sagīr-i mezbûrun vâlidesi ve tesviye-i umûruna kıbel-i şer‘den mansûbe vasîsi mezbûre Râbia bt. İbrahim b. Mehmed tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahmiye-i mezbûrede Balatkapısı kurbünde el-Hâc Halil mahallesinde sâkin Süleyman Çelebi b. Mehmed ve Mehmed b. Osman şehâdetleriyle mahzar-ı hasm-ı câhidde sâbit ve sübût-ı vekâletine hükmolunan Mehmed Efendi b. Halil vekâleten meclis-i ma‘kūd-ı mezbûrda râfi‘ü’l-kitâb mezbûr el-Hâc Mustafa b. Ali mahzarında her biri üzerine da‘vâ ve takrîr-i kelâm edip müteveffâ-yı mezbûr el-Hâc Ali’nin mezbûr Hacı Mustafa zimmetinde iştirâ ve kabz eylediği ba‘de’l-hesâb kereste semeninden on altı bin dört yüz sağ akçe hakkı vardır, meblağ-ı mezbûru kable’l-ahz fevt olmağla meblağ-ı mezbûru mezbûr el-Hâc Mustafa’dan taleb ederiz suâl olunsun dedikde gıbbe’s-suâl mezbûr el-Hâc Mustafa cevâbında işbu yedimde müteveffâ-yı mezbûr el-Hâc Ali b. İbrahim b. Mehmed’in imzâ ve hatmiyle mümzâ ve mahtûm deyn temessükü mûcebince cihet-i karzdan on sekiz bin sağ akçe hakkı olup bana deyni olan ol mikdâr akçenin benim kereste semeninden ba‘de külli’l-hesâb deynim olan on altı bin dört yüz sağ akçesine takas ol dahi mukāssa ve kabûl edip benim onun zimmetinde bin altı yüz sağ akçe hakkım kalmışdır deyü def‘le mukābele edicek gıbbe’l-istintâk ve’l-inkâr merkūm el-Hâc Mustafa’dan def‘-i meşrûhuna beyyine taleb olundukda udûl-ı ahrâr-ı ricâl-i Müslimînden mu‘arrifân-ı mezbûrân Süleyman Çelebi b. Mehmed ve Kara Mehmed b. Osman li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı [mezbûr] el-Hâc Ali b. İbrahim b. Mehmed’in işbu deyn temessükü mûcebince merkūm el-Hâc Mustafa b. el-Hâc Ali’ye cihet-i karzdan deyni olan on sekiz bin sağ akçenin altı bin dört yüz akçesini merkūm el-Hâc Mustafa’nın zikr olunan kereste semeninden müteveffâ-yı mezbûr el-Hâc Ali’ye deyni olan on altı bin dört yüz akçesine takas ol dahi mukāssa ve kabûl edip bâkī zimmetimde cihet-i karzdan bin altı yüz sağ akçe deynim vardır deyü huzûrumuzda ikrâr ve işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye kabûl olmağın gıbbe’t-tahlîfi’ş-şer‘î mûcebince ba‘de’l-hükm mezbûr el-Hâc Mustafa meclis-i ma‘kūd-ı mezbûrda mezbûrân Süleyman Çelebi ve Mehmed Beşe mahzarlarında ikrâr ve takrîr-i kelâm edip ânifen edâsına tenbîh olunan bin altı yüz akçe talebinden verese-i mezbûrûnun zimmetlerini ibrâ-i âm ile ibrâ ve ıskāt eyledim dedikde gıbbe’t-tasdîk müvekkile-i mezbûre Râbia Hatun asâleten ve mezbûr Süleyman Çelebi <> asâleten meclis-i ma‘kūd-ı mezbûrda mezbûr el-Hâc Ali mahzarında her biri ikrâr ve takrîr-i kelâm edip mûrisimiz müteveffâ-yı mezbûrun terekesinden bize isâbet eden cemî‘ mîrâs da‘vâsından mezbûr el-Hâc Mustafa’nın zimmetini her birimiz ibrâ-i âmm-ı katı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû irsâl olunan Hasan Çelebi b. Abdullah ve Mehmed b. Ahmed ile meclis-i şer‘a gelip vukū‘u üzere inhâ ve takrîr etmeğin ketb olundu. Fî 3 min-Cumâdelâhir sene 1110. Şuhûdü’l-hâl: el-Hâc Ahmed Efendi b. Muslu, Hoca Ahmed Çelebi b. Memi, el-Hâc Ahmed b. Mehmed, el-Hâc Ali b. Abdullah, Yusuf Çelebi b. Şa‘bân, İbrahim b. el-Hâc Ali