Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 608 Hüküm no: 476 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bevvab Hasan Bey’in varislerinin terekeden haklarını vasi Mehmed Ağa’dan aldıkları Husûs-ı âti’l-beyânın mahallinde tahrîri iltimâs olunmağın savb-ı şer‘den irsâl olunan İmâmzâde Mevlânâ Mehmed Efendi b. Ahmed Efendi Mahmiye-i İstanbul’da Saray-ı atîk-i sultânî kurbünde Mercan Ağa mahallesi ahâlîsinden fahrü’l-akrân Musa Ağa b. Abdülmuttalib’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde Mahmiye-i mezbûre ahâlîsinden olup tarîk-i hacc-ı şerîfde Bedr-i Huneyn’de vefât eden Bevvâb Hasan Bey b. İbrahim b. Ali’nin verâseti zevce-i menkûha-i metrûkesi Fâtıma bt. Abdullah ile li-eb kız karındaşı Emine’ye ve karındaşı (°) oğulları Hüseyin ve Mehmed ve İsmail ve Yusuf’a münhasıra ve tashîh-i meselesi kırk sekiz sehmden olup sihâm-ı mezbûreden on iki sehmi zevcesi mezbûre Fâtıma Hatun’a ve yirmi dört sehmi kız karındaşı mezbûre Emine’ye ve bâkī on iki sehmden üç sehmi mezbûrûn Mehmed ve Hüseyin ve İsmail ve Yusuf’dan her birine isâbeti tahakkukundan sonra zâtları Gedikpaşa Câmi‘i İmâmı Hüseyin Efendi b. İsmail ve Bevvâb el-Hâc Mehmed b. İbrahim ta‘rîfleriyle mu‘arrefe olan mezbûretân Fâtıma ve Emine’den her biri meclis-i ma‘kūd-ı mezbûrda müteveffâ-yı mezbûrun terekesini veresesine îsâle bâ-hüccet-i şer‘iyye vasiyy-i muhtârı olmağla terekesine vâzı‘u’l-yed olan el-Hâc Mehmed Ağa b. Hüseyin mahzarında ikrâr ve takrîr-i kelâm edip mûrisimiz müteveffâ-yı mezbûrun terekesinden ba‘de ihrâci’l-mesârif para üç akçe hesâbı üzere vasiyy-i mezbûr yedinden bâkī kalan yetmiş sekiz bin yüz altmış akçeden bizim hissemize isâbet eden kırkar sekiz bin sekiz yüz elli akçeyi vasiyy-i mezbûr el-Hâc Mehmed Ağa işbu meclis-i ma‘kūd-ı mezbûrda tamâmen bize def‘ ü teslîm biz dahi bi-kadri’l-hısâs yedinden ahz u kabz eyledikden sonra tereke-i müteveffâ-yı mezbûrun dâhil-i defter ve hâric-i defter terekesine müte‘allıka âmme-i da‘vâdan vasiyy-i mezbûrun zimmetini ibrâ ve ıskāt eyledik min-ba‘d müteveffâ-yı mezbûrun tereke[sine] müte‘allıka vasiyy-i mezbûr ile vechen mine’l-vücûh da‘vâ ve nizâ‘ımız yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr el-Hâc Süleyman b. Abdullah ve Muhzır Mehmed b. Hasan ile meclis-i şer‘a gelip inhâ ve takrîr etmeğin mâ-vaka‘a şüd. Fî 10 min-Cumâdelevvel sene 1110. Şuhûdü’l-hâl: Cafer b. Derviş Hamza, el-Hâc Musa b. Abdülmuttalib, el-Hâc Mustafa Efendi b. Abdurrahman, Mehmed Efendi b. Ahmed, el-Hâc Mahmud b. Mustafa, Hâfız el-Hâc Mustafa b. Ahmed.