Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 609 Hüküm no: 477 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un mehrini kocası Hasan Bey’in terekesinden aldığı Kezâlik isâbeti tahakkukundan sonra zâtı Hüseyin Efendi b. İsmail ve Bevvâb el-Hâc Mehmed b. İbrahim ta‘rîfleriyle mu‘arrefe olan zevcesi işbu râfi‘atü’l-kitâb mezbûre Fâtıma meclis-i ma‘kūd-ı mezbûrda müteveffâ-yı mezbûrun vasiyy-i muhtârı olmağla terekesine vâzı‘u’l-yed olan Serdâr el-Hâc Mehmed Ağa b. Hüseyin mahzarında da‘vâ ve takrîr-i kelâm edip zevcim müteveffâ-yı mezbûr Hasan Bey b. İbrahim b. Ali zimmetinde mütekarrer ve ma‘kūdün-aleyh yüz guruş mehr-i müeccel hakkım olup hattâ müteveffâ-yı mezbûr fevtinden bir ay mukaddem hâl-i kemâl-i sıhhatinde mahzar-ı Müslimînde ikrâr ve işhâd ettikden sonra kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden Saray-ı atîk serdârlarından el-Hâc Süleyman b. Muhyî ve el-Hâc Hasan b. Ali li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Hasan Bey b. İbrahim b. Ali fevtinden bir ay mukaddem hâl-i kemâl-i sıhhatinde zevcesi işbu müdde‘iye-i mezbûre Fâtıma Hatun’a zimmetinde mütekarrer ve ma‘kūdun-aleyh deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîf mûcebiyle ba‘de’l-hükm mezbûre Fâtıma Hatun meclis-i ma‘kūd-ı mezbûrda vasiyy-i mezbûr mahzarında ikrâr edip îfâ-i edâsına hükmolunan yüz guruşu vasiyy-i mezbûr yedinde tamâmen ahz u kabz eyledim dedikde vâki‘ü’l-hâli ilâ-âhirihî. Şâhidûnü’s-sâbikūn