Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 609 Hüküm no: 478 Orijinal metin no: [112b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un varislerinden Ayşe Hatun ile diğer varisler arasındaki davaya sulh bedeli karşılığı son verildiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden me’zûnen Mehmed Rûşenî Efendi irsâl olunup ol dahi mahmiye-i İstanbul’da Molla Zeyrek mahallesinde sâkine iken bundan akdem vefât eden Hacce Saliha Hatun bt. Üveys b. Abdullah’ın sâkine olduğu menzilinde zeyl-i vesîkada muharrerü’l-esâmî Müslimîn huzûrlarından akd-i meclis-i şer‘-i şerîf ettikde müteveffât-ı mezbûrenin verâseti sadriye kebîre kızı Âişe Hatun bt. el-merhûm Hüseyin Efendi ile li-ebeveyn kız karındaşları olup mahmiye-i mezbûrede Keçeci Pîrî mahallesinde sâkine Ümmühani ve Üsküdar’da Rum Mehmed Paşa mahallesinde sâkine İsmihan nâm hatunlara münhasıra ve tashîh-i meselesi dört sehmden olup sihâm-ı mezbûrenin iki sehmi kızı mezbûreye ve bâkī iki sehmin birer sehmi kız karındaşları mezbûretândan her birine isâbet ve intikāl eylediği şer‘an zâhir ve mütebeyyin oldukdan sonra müteveffât-ı mezbûreden kendülere isâbet eden hisse-i irsiyelerini ahz u kabz ve kendülere îsâle ve lede’l-iktizâ sulh [ve] ibrâya mezbûretân Ümmühani ve İsmihan Hatun ibnetey Üveys b. el-mezbûr Abdullah taraflarından husûs-ı âti’l-beyânda vekîl olduğu zât-ı mezbûretânı mûceb-i şer‘iyye ile ârifûn zikr olunan Keçeci Pîrî mahallesinde sâkin İbrahim Efendi b. Mehmed Efendi [ve] Kadıçeşmesi kurbünde Mukayyid Ahmed Efendi Medresesi’nde Şeyh es-Seyyid Mehmed Çelebi b. Hüseyin ve Rum Mehmed Paşa mahallesinde es-Seyyid İsmail Çelebi b. Hüseyin işhâdlarıyla mahzar-ı câhidde sâbit ve sübût-ı vekâletine hükm-i şer‘î lâhık olan Hasan Efendi b. Mustafa meclis-i ma‘kūd-ı mezbûrda müteveffât-ı mezbûrenin kebîre kızı olup zâtı ta‘rîf-i şer‘î ile mu‘arrefe olmağla terekesine bi’l-vekâle vaz‘-ı yed eden bâ‘isetü’l-kitâb merkūme Âişe Hatun muvâcehesinde bi’l-vekâle ikrâr ve takrîr-i kelâm edip müteveffât-ı mezbûre Hacce Saliha Hatun vefât edip terekesi tahrîr olundukda, mezbûre Âişe Hanım terekeden iki sepet içinde mecmû‘u beş yüz guruş kıymetli bir cild Dürer ve bir Kadıhan’ı ve bir Sadrü’ş-şerî‘a ve bir Tatarhanî ve bir tefsîr-i Beydâvî ve sâir elli cild kitâbları dört kîse guruş ki her kîsesi beşer yüz guruşdan iki bin yüz guruş ve elli guruş kıymetli elli sahan ve altmış guruş kıymetli otuz tencere ve üç yüz guruş kıymetli bir bütün mücevher kuşak ve altmış guruş kıymetli bir çift kebîr altın bilezik [113a] ve üç yüz guruş kıymetli inci askılı bir çift zümrüd küpe ve yüz guruş kıymetli incili serpûş ve seksen guruş kıymetli sırmalı on işleme yasdık ve yirmi guruş kıymetli bir sîm sâ‘at ve yirmi guruş kıymetli bir sîm kılıç ve on beş guruş kıymetli on gömleklik kenârlı bez mecmû‘u ile Molla Zeyrek mahallesinde Ayasofya-i kebîr Vakfı’na senede doksan akçe mukāta‘a-i kadîmesi olup Konakçı Ali Paşa’dan iştirâ olundukdan sonra muhterik olan bir tarafdan zikr olunan Molla Zeyrek mahallesi imâmına ve müezzinine ve kayyımlarına meşrûta vakıf menzil ve bir tarafdan el-Hâc Mehmed Ağa menzili ve bir tarafdan el-Hâc Mustafa mülkü ve bir tarafdan tarîk-i âmma müntehî mülk arsa ve hâlâ mahalle-i mezbûrede yine Ayasofya-i kebîr Vakfı’na senede sekiz akçe mukāta‘a-i kadîmesi olup bir tarafdan es-Seyyid Mehmed Ağa mülküne ve bir tarafdan mezbûr es-Seyyid Mehmed Ağa bahçesine ve bir tarafdan Yağlıkçı el-Hâc Ali sâkini olduğu menzili ve bir tarafdan tarîk-i âmma müntehî hâriciye ve dâhiliyeyi müştemil mülk menzil mecmû‘u müteveffât-ı mezbûrenin ile’l-vefât mülkü olup mezbûre Âişe Hatun müstakılleten zabt ve mîrâsa idhâlden imtinâ‘ eder deyü mezbûreden [suâl] ve mezbûre bi’l-külliye inkâr edip beynimizde münâza‘ât vukū‘undan sonra muslihûn tavassut edip fedâ-i li’l-yemîn an-inkâr tarafeyn yüz guruşa inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu işbu meclisde mezbûre Âişe Hatun yedinden tamâmen alıp kabz edip bâlâda tafsîl olunduğu üzere kitâblar ve nakid akçe ve eşyâ ve arsa ve menzil celîl ü hakīr ve kalîl ü kesîr âmme-i mîrâs da‘vâsından mezbûre Âişe Hatun’un zimmetini ibrâ-i âmm-ı katı‘u’n-nizâ‘la ibrâ ve ıskāt eyledim, ol dahi medfû‘u olan yüz guruş da‘vâsından müvekkilelerimin zimmetlerini ibrâ eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Mehmed Beşe b. Hüseyin ve Molla İsmail b. Zülfikar ile meclis-i şer‘de inhâ ve takrîr etmeğin mâ-vaka‘a kayd şüd. Fî gurre-i Cumâdelûlâ sene 1110. Şuhûdü’l-hâl: Umdetü’l-meşâyih eş-Şeyh Ömer Efendi b. eş-Şeyh Aynî, İmâm Abdulkadir Efendi b. İsmail, es-Seyyid Mehmed Ağa b. Ali Çavuş, Ali Beşe b. Seyyid Sefer, Yağlıkçı Hacı Ali b. Osman, el-Hâc Ebubekir b. Abdülkerim, ...? el-Hâc Mehmed b. Hacı Osman, es-Seyyid Mehmed b. es-Seyyid [Ve]li