Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 611 Hüküm no: 479 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacdan dönerken vefat eden İbrahim’in varislerinin terekeden haklarını aldıkları Husûs-ı âti’l-beyânın mahallinde tahrîr [ve] istimâ‘ı iltimâs olunmağın savb-ı şer‘den me’zûnen Mevlânâ Abdurrahman Efendi b. el-müteveffâ el-merhûm Ahmed Efendi irsâl olunup ol dahi mahmiye-i İstanbul’da Uzun Yusuf mahallesi ahâlîsinden olup bu sene-i mübârekede hacc-ı şerîfden gelirken Huneyn nâm mevzi‘de vefât eden el-Hâc İbrahim b. Hasan b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî eyledikde müteveffâ-yı mezbûrun verâseti zevce-i menkûha-i metrûkesi Afife Hatun bt. Ahmed Efendi ile kebîr oğlu Mehmed Çelebi’ye ve sagīr oğlu Osman’a münhasır olup tashîh-i meselesi on altı sehmden olmağla sihâm-ı mezbûrenin iki sehmi mezbûre Afife’ye ve bâkī on dört sehmin yedişer sehmi oğulları mezbûrlardan her birine isâbet ettikden sonra zâtı mahalle-i mezbûrede sâkin Şa‘bân Çelebi b. Ali ve Ahmed Çelebi b. Hasan ta‘rîfleriyle mu‘arrefe olan mezbûre Afife Hatun bt. Ahmed Efendi meclis-i ma‘kūd-ı mezbûrda üvey oğlu hâfızü’l-kitâb merkūm Mehmed Çelebi mahzarında ikrâr ve takrîr-i kelâm edip zevcim müteveffâ-yı mezbûrun terekesi tahrîr ve ba‘de ihrâci’l-mesârif iki yüz guruş mehr-i müeccel müsemmâ ve tashîh-i mezbûr üzere ber-mûceb-i defter-i kassâm-ı askerî hisseme isâbet eden para üçer akçe hesâbı üzere yirmi altı bin altı yüz doksan dokuz akçe hakkımı ve sagīr-i mezbûr Osman’a tashîh-i mezbûr üzere isâbet eden para üçer akçe hesâbı üzere doksan üç bin dört yüz kırk yedi akçe hissesi sagīr-i mezbûrun vasîsi olduğum hasebiyle vesâyeten tereke-i müteveffâ-yı mezbûra vaz‘-ı yed eden merkūm Mehmed Çelebi yedinden tamâmen alıp kabz edip zimmetinde defter-i mezbûr üzere bir akçe ve bir habbe hakkım kalmayıp tereke-i mezbûra müte‘allık âmme-i de‘âvî ve mutâlebâtdan ve eymân ve muhâsamâtdan merkūm Mehmed Çelebi’nin zimmetini ibrâ ve ıskāt eyledim dedikde gıbbe’t-tasdîk merkūm Mehmed Çelebi meclis-i ma‘kūd-ı mezbûrda mezbûre Afife mahzarında ikrâr ve takrîr-i kelâm edip ben dahi defter-i mezbûr üzere hisseme isâbet eden para üçer akçe hesâbı üzere doksan üç bin dört yüz kırk yedi akçe hakkımı tamâmen ahz u kabz eyledim ba‘de’l-yevm terekeden hisseme isâbet eden cemî‘ mîrâs da‘vâsından mezbûrun deynini ibrâ-i âmm-ı katı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ba‘dehû ma‘an mürsel İbrahim Hakkı b. Mehmed ve Ahmed b. Ali ile meclis-i şer‘de vukū‘u üzere inhâ ve takrîr etmeğin mâ-vaka‘a kayd şüd. Fî 6 min-Cumâdelâhir sene 1110. Şuhûdü’l-hâl: Ahmed Efendi b. Ali, fahrü’l-eşbâh İbrahim Ağa b. Musa, Mustafa Efendi b. Musa, Hüseyin Çelebi b. Halil, Abdurrahman Ağa b. Abdullah, Mustafa Çelebi b. Mehmed, ve gayruhum