Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 612 Hüküm no: 480 Orijinal metin no: [113b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un mehrinin vefat eden eşi Mehmed Ağa’nın terekesinden verilmesi Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen irsâl olunan Mevlânâ Ali Rıfkı b. el-Hâc Yusuf Mahmiye-i İstanbul’da Bezzâz-ı cedîd mahallesinde sâkin iken bundan akdem vefât eden Surre Emîni el-Hâc Mehmed Ağa b. Şa‘bân b. Abdurrahman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî olundukda müteveffâ-yı mezbûrun zevce-i menkûha-i metrûkesi olup zâtı mahalle-i mezbûre sükkânından el-Hâc Mustafa Ağa b. İbrahim ve el-Hâc Mehmed Ağa b. Abdülbaki ta‘rîfleriyle mu‘arrefe olan bâ‘isetü’l-kitâb Rukiye Hatun bt. Abdullah meclis-i ma‘kūd-ı mezbûrda müteveffâ-yı mezbûrun evlâd-ı sıgārı Ahmed Çelebi ve İsmail ve Âişe’nin tesviye-i emrlerine tashîhan li’s-sak vasî nasb olunan Uşşâkī Mehmed Çelebi b. Receb mahzarında üzerine da‘vâ ve takrîr-i kelâm edip müteveffâ-yı mezbûr Mehmed Ağa b. Şa‘bân b. Abdurrahman hayâtında tezevvüc murâd eyledikde nefsimi iki yüz guruş mehir tesmiyesiyle şuhûd mahzarında tezevvüc ve kabûl edip bu vechile akd-i nikâh beynimizde kāim iken kable’l-edâ fevt olmağla terekesinden taleb ederim dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden mu‘arrifân-ı mezbûrân el-Hâc Mustafa ve el-Hâc Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Surre Emîni el-Hâc Mehmed Ağa b. Şa‘bân b. Abdurrahman hayâtında tezevvüc murâd eyledikde işbu müdde‘iye-i mezbûre Rukiye Hatun bt. Abdullah nefsini huzûrumuzda iki yüz guruş mehr-i müeccel tesmiyesiyle müteveffâ-yı mezbûra tezvîc ol dahi minvâl-i muharrer üzere tezevvüc ve kabûl edip beynlerinde bu vechile akd-i nikâh kāim iken fevt olup biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîf mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel İbrahim Çelebi b. Mehmed ve Nasuh b. Yusuf ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Şuhûdü’l-hâl: Umdetü erbâbi’t-tahrîr Tezkireci Hâfız Mehmed Efendi, Mehmed Ağa b. Şa‘bân, el-Hâc Ahmed Ağa b. Abdullah, el-Hâc Mustafa b. Cafer, Mehmed Çelebi b. Hasan