Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 613 Hüküm no: 482 Orijinal metin no: [113b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin evdeki kendine ait hissesini annesi Feta Hatun’a sattığı Mahmiye-i İstanbul’da Molla Aşkī mahallesinde sâkine iken bundan akdem vefât eden Mustafa Efendi b. Mehmed’in verâseti zevce-i menkûha-i metrûkesi Feta Hatun bt. Abdulkadir’e ve mezbûrenin batnında mütebeyyin hamle ve sulbî kebîr oğlu İbrahim Çelebi’ye münhasıra olduğu şer‘an mütehakkık oldukdan sonra mezbûr İbrahim Çelebi meclis-i şer‘-i şerîfde zâtı ta‘rîf-i şer‘î ile mu‘arrefe olan vâlidesi işbu bâ‘isetü’l-kitâb mezbûre Feta Hatun mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Mustafa? Beşe mülkü ve bir tarafdan Örmeci Vakfı ve bir tarafdan Abdüllatif ve Köroğlu menzilleri ve bir tarafdan tarîk-i âm ile mahdûd hâricen ve dâhilen büyût-ı adîdeyi müştemil mülk menzilin nısfı vâlidem mezbûrenin ve nısf-ı âharı babam müteveffâ-yı mezbûrun mülkü omağla ba‘de vefâtihî menzil-i mezbûrun nısf-ı şâyi‘i on altı sehm i‘tibâr olup sihâm-ı mezbûrenin iki sehmi mezbûreye ve yedişer sehmi bana ve haml-i mezbûra irsen isâbet etmeğin el-hâletü hâzihi nısf menzil-i mezbûrda ber-vech-i muharrer hisse-i irsiyem olan yedi sehm-i şâyi‘i bi-cümleti’t-tevâbi‘ ve’l-levâhık bey‘-i kat‘î ile vâlidem mezbûre Feta Hatun’a yüz kıt‘a esedî guruşa bey‘ ve temlîk ve teslîm ol dahi iştirâ ve kabûl ve tesellüm ettikden sonra semen olan meblağ-ı mezbûr yüz guruşu vâlidem mezbûre Feta Hatun işbu meclis-i şer‘de bana edâ ve teslîm ben dahi yedinden tamâmen ahz u kabz eyledim ba‘de’l-yevm menzil-i mezbûrda alâka ve medhalim kalmayıp mârrü’z-zikr yedi sehm hisse-i irsiyem vâlidem mezbûre Feta Hatun’un mülk-i müşterâsı ve hakk-ı sarfı olmuşdur keyfe mâ teşâ ve tehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a kayd şüd. Fî 4 min-Cumâdelûlâ li-sene aşer ve mi’e ve elf. Şuhûdü’l-hâl: Ahmed Çelebi [b.] Süleyman, Mehmed Efendi b. Velizâde, Ahmed Ağa b. Abdi, Yusuf Efendi b. Musa, el-Hâc Ali Ağa b. Mustafa, Hasan Efendi b. Mehmed