Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 614 Hüküm no: 484 Orijinal metin no: [114a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın varislerinin terekeden haklarını aldıkları Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den irsâl olunan Mevlânâ Abdurrahman Efendi b. Ahmed Efendi mahmiye-i İstanbul’da Uzun Yusuf mahallesi ahâlîsinden olup işbu sene-i mübârekede hacc-ı şerîfden gelir [iken] Huneyn nâm mevzi‘de bundan akdem vefât eden el-Hâc İbrahim Ağa b. Hüseyin’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm eyledikde müteveffâ-yı mezbûrun verâseti zevce-i menkûhası Afife Hatun bt. Ahmed Efendi ile sulbî kebîr oğlu Mehmed Çelebi ve sagīr oğlu Osman’a münhasıra olduğu şer‘an mütehakkık oldukdan sonra zâtı ba‘de’t-ta‘rîfi’ş-şer‘î mu‘arrefe olan mezbûre Afife Hatun asâleten ve oğlu mezbûr Osman’ın tesviye-i umûruna vasiye-i muhtâresi olmağla vesâyeten ve mezbûr Mehmed Çelebi asâleten meclis-i ma‘kūd-ı mezbûrda müteveffâ-yı mezbûrun hâl-i hayâtında yedinde mevcûd olan terekesini kabz ve veresesine îsâle vasiyy-i muhtârı olan el-Hâc Ali b. Mehmed mahzarında her biri ikrâr ve takrîr-i kelâm edip mûrisimiz müteveffâ-yı mezbûrun terekesi tahrîr ve defter olup ber-mûceb-i defter-i kassâm-ı askerî ba‘de ihrâci’l-mesârif sahhe’l-bâkī vasiyy-i mezbûrun makbûzu olan cem‘an yirmi dokuz bin iki yüz seksen sağ akçeyi bi-kadri’l-hısâs yedinden tamâmen ahz u kabz eyledik min-ba‘d tereke-i müteveffâ-yı mezbûrdan vasiyy-i merkūm yedinde ve zimmetinde bir akçe ve bir habbe hakkım bâkī kalmadı dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ba‘dehû ma‘an mürsel İbrahim Çelebi b. Mehmed ve Mehmed b. Ahmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Şuhûdü’l-hâl: İbrahim Ağa b. Musa, Mustafa Efendi b. Rasûl, Hüseyin Çelebi b. Halil, Mustafa Çelebi b. Halil, Mehmed Ağa b. Muslu