Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 615 Hüküm no: 486 Orijinal metin no: [114a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin vefat eden kardeşi Baltacı Hüseyin’den kalan malları tamamen aldığı Husûs-ı âti’l-beyânın mahallinde ketb ü tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ el-Hâc Abdurrahman Efendi b. Mustafa el-Âmidî mahmiye-i İstanbul’da Hadîka-i hâssa-i şehriyârîde vâki‘ Orta Câmi‘i kurbünde Çiğil odası demekle ma‘rûf odaya varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i şerîf ettikde Solak odasında sâkin olup bundan akdem Edirne’de müsâfiren vefât eden İkinci Baltacı Hüseyin Bey b. Sinan’ın li-ebeveyn karındaşı ve hasren vârisi İbrahim Efendi b. el-merkūm Sinan meclis-i ma‘kūd-ı mezbûrda zikr olunan odada hâlâ sâkin işbu hâfızü’l-kitâb Abdullah Çavuş b. Ahmed mahzarında ikrâr ve takrîr-i kelâm edip müteveffâ-yı mezbûrun hîn-i fevtinde mahrûse-i Edirne’de yanında mevcûd bulunup hâlâ Edirne’de Haseki Ağa olan izzetlü Mehmed b. Ali tarafından terekesini defter edip mezbûr Abdullah Çavuş yediyle bu tarafa irsâl eylediği defter mûcebince işbu bir Mushaf-ı şerîf ve bir aba yağmurluk ve bir kırmızı ve bir alaca iki kilim ve bir Yanbolu kebesi ve bir mor çuka yağmurluk ve bir mor çuka dilki paçası kürk ve iki kırmızı çuka çakşır ve dört zirâ‘ yeşil çuka ve bir diz çakşırı ve bir mâî çintiyân ve iki beyâz zıbın ve iki yeşil bogasi kapama ve bir kara kılıç ve üç cedîd kenârlı gömlek ve iki uçkur ve bir don ve bir makrama ve bir köhne kuşak ve bir yeşil çuka yelek ve bir dokuma makrama ve bir çift cedîd çizme ve pabuç ve iki köhne çintiyân ve iki mâî zıbın ve üç perde ve beş kellepûş ve bir heğbe ve bir fener ve bir kırmızı çuka dolama [114b] ve bir çuka yasdık ve bir peştemâl ve bir çift Mısır makraması ve bir köhne peşkir ve bir çift tozluk ve bir kavuk ve iki alaca zıbın ve bir kahve ibrik ve bir leğen ve bir tencere bâ-kapak ve bir tâbe ve bir sahan ve bir külâh ma‘a sepet ve bir kebîr leğen ve bir sîm sagīr kuşak ma‘a kolan ve bir çift Macar bıçağı ve bir cüzdân ve bir kefgir ve bir kefçe ve bir eyer ve bir anberî ma‘a âlât ve bir semer ve üç şetli garâr ve iki sâde ile nakid bir yaldız altını ve iki eşrefî altının a‘yânı mevcûde olmağla mezbûr Abdullah Çavuş yedinden tamâmen ahz u kabz eyledim, eşyâ-i mezkûreden ve nukūddan mezbûr Abdullah Çavuş yedinde bir şey kalmayıp müşârün-ileyh Haseki Mehmed Ağa’nın ve merkūm Abdullah Çavuş’un irse müte‘allık âmme-i mîrâs da‘vâsından zimmetlerini ibrâ-i âm ile ibrâ ve ıskāt eyledim dedikde gıbbe’t-tasdîk vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hasan Çelebi b. Abdullah ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd şüd. Fî 5 Cumâdelûlâ sene 1110. Şuhûdü’l-hâl: Fahrü’l-müderrisîn Mehmed Efendi b. Ali Ağa, İbrahim Efendi b. Yazıcı, Osman Bey b. Süleyman, Kuşçuzâde, Mehmed Halîfe b. Mustafa