Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 633 Hüküm no: 496 Orijinal metin no: [117a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacdan dönerken vefat eden Ahmed Efendi’nin oğlu Abdülahad’ın vasisi Kayyım Mustafa Çelebi’nin terekeyi Ali b. Hasan’dan aldığı Mahmiye-i İstanbul’da Kabasakal Sinan Ağa mahallesi imâmı olup Mekke-i mükerremeden -şerefellâhu te‘âlâ- gelirken Bi’r-i Ali nâm menzilde bundan akdem vefât eden el-Hâc Ahmed Efendi b. Mehmed b. Ahmed’in oğlu ve hasren vârisi sagīr Abdülahad’ın vech-i âtî üzere vasiyy-i muhtârı olduğunu iddi‘â eden mahalle-i mezbûrede sâkin hâfızü’l-kitâb Kayyım Mustafa Çelebi b. Osman meclis-i şer‘-i hatîr-ı lâzımü’t-tevkīrde Mesihpaşa mahallesinde sâkin el-Hâc Ali b. Hasan mahzarında üzerine da‘vâ ve takrîr-i kelâm edip müteveffâ-yı mezbûr İmâm el-Hâc Ahmed Efendi b. Mehmed b. Ahmed işbu sene-i mübârekede hacc-ı şerîfe gider oldukda cemî‘ umûruna beni vekîl ve bi-emrillâhi te‘âlâ fevt olursam sagīr oğlum Abdülahad’ın vakt-i rüşd ü sedâdına değin tesviye-i umûruna beni vasiyy-i muhtâr nasb ü ta‘yîn edip ben dahi muvâcehesinde ba‘de’l-kabûl musırran alâ-îsâihî menzil-i merkūmda fevt olmağla hîn-i fevtinde yanında mevcûd olan eşyâsını bey‘ ve semenini ahz ve îsâle mezbûr el-Hâc Ali vasî olmağın ber-mûceb-i defter-i kassâm mahfil-i şerîf[de] ba‘de ihrâci’l-mesârif makbûzu olan iki bin altı yüz iki parayı mezbûr el-Hâc Ali’den taleb ederim suâl olunsun dedikde gıbbe’s-suâl mezbûr el-Hâc Ali cevâbında vech-i muharrer üzere tereke-i müteveffâ-yı mezbûrdan meblağ-ı merkūma vaz‘-ı yedini [117b] ikrâr lâkin müdde‘î-i mezbûrun vesâyetini inkâr edicek müdde‘î-i mezbûrdan sıdk-ı makāline beyyine taleb olundukda udûl-ı Müslimînden olup zikr olunan Kabasakal mahallesi ahâlîsinden fahrü’l-cüyûş Hasan Çavuş b. Şa‘bân ve el-Hâc Hasan b. Ali li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr İmâm el-Hâc Ahmed Efendi b. Mehmed b. Ahmed hacc-ı şerîfe gider oldukda cemî‘ umûruna müdde‘î-i mezbûru vekîl ve bi-emrillâhi te‘âlâ fevt olursam sagīr oğlu Abdülahad’ın vakt-i rüşd ü sedâdına değin tesviye-i umûruna huzûrumuzda müdde‘î-i merkūm Kayyım Mustafa Çelebi’yi vasiyy-i muhtâr nasb ü ta‘yîn edip ol dahi muvâcehesinde ba‘de’l-kabûl musırran alâ-îsâihî vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh vasiyy-i mezbûr Kayyım Mustafa Çelebi mahfil-i kazâda mezbûr el-Hâc Ali mahzarında bi’l-vesâye ikrâr ve takrîr-i kelâm edip ber-mûceb-i defter-i merkūm ba‘de ihrâci’l-mesârif makbûzu olan meblağ-ı merkūm iki bin altı yüz iki parayı ve hâric ez-defter makbûzu olan iki top telli bâdî ve bir top mûmî? yemenî ve bir yeşil hilâlî kuşak ve on iki fincan-ı Mekkî’yi mezbûr el-Hâc Ali yedinden ahz u kabz eyledim, meblağ-ı merkūm ile eşyâ-i mezkûreden yedinde bir şey kalmadı dedikde gıbbe’t-tasdîkı’ş-şer‘î mâ-vaka‘a kayd şüd. Fî 2 Cumâdelûlâ sene 1110. Şuhûdü’l-hâl: Mehmed Efendi b. Şa‘bân, el-Hâc Abdullah b. Hasan, Halil Efendi b. Hasan, Abdullah çelebi b. Abdullah, Abdülaziz b. Hacı Mehmed, el-Hâc Nasuh b. Ebubekir