Bab Mahkemesi 54 Numaralı Sicil (H. 1102 / M. 1691) cilt: 20, sayfa: 52 Hüküm no: 5 Orijinal metin no: [1a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Efendi b. Abdurrahman’ın Ömer Efendi b. İbrahim’deki alacaklarını mirasçılarından alması Mahmiye-i İstanbul’da Ha[rrâ]t Kemal mahallesi sâkinlerinden olup sâbıkan Yanya kadısı olan Osman Efendi b. Abdurrahman tarafından husûs-ı âti’l-beyâna vekîl olduğu Yusuf Ağa b. Abdurrahman ve Süleyman Çelebi b. Hüseyin şehâdetleriyle şer‘an sâbit ve mahkûmun-bih olan Mustafa Efendi b. Şaban meclis-i şer‘-i şerîf-i enverde, mahmiye-i mezbûrda Mimar Sinan mahallesi ahâlîsinden olup, Eğriboz Kadısı iken bundan akdem vefât eden Ömer Efendi b. İbrahim b. Musa’nın verâseti, sulbî oğlu İbrahim Efendi ile zevce-i metrûkesi Afife bt. Mahmud Efendi nâm hâtuna münhasıra olmağla terekesine vâzı‘u’l-yed bulunan mezbûr İbrahim mahzarında bi’l-vekâle üzerine da‘vâ ve takrîr-i kelâm edip, müvekkilim mezbûr Osman Efendi eşyâ-i memlûkesinden bin yüz yirmi beş vakıyye Trablus sabunu her vakıyyesi otuz ikişer akçe olmak üzre otuz altı bin akçeye bundan akdem müteveffâ-yı mezbûre Ömer Efendi’ye hayâtında bey‘ ve teslîm ol dahi vech-i muharrer üzre iştirâ ve teslîm [tesellüm] ve kabz eylediğinden sonra meblağ-ı mezbûrun altı bin kefîli Hızır Efendi yedinden ahz u kabz, bâkī otuz bin akçesi müvekkilim mezbûr Osman Efendi ahz ve istîfâ etmeden merkūm Ömer Efendi fevt olup zimmetinde kalmakla suâl olunup, meblağ-ı mezbûr otuz bin akçeyi tereke-i vâfiyesinden müvekkilim mezbûr için bana yine teslîme mezbûr İbrahim Efendi’ye tenbîh olunmak matlûbumdur dedikde, gıbbe’s-suâl İbrahim Efendi cevâbında. tereke-i müteveffâ-yı mezbûra vaz‘-ı yedini ikrâr, lâkin deyn-i mezkûru inkâr etmekle, vekîl-i mezbûrdan ber vech-i meşrûh müdde‘âsına beyyine taleb olundukda, zikri mürûr eden Harrât Kemaleddin mahallesi sâkinlerinden Süleyman Ağa b. Hüseyin Ağa ve Çivizâde mahallesi sâkinlerinden Mehmed Çelebi b. Ali nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-hakīka müvekkil-i mezbûr Osman Efendi eşyâ-i memlûkesinden bin yüz yirmi beş vakıyye Trablus sabunu beher vakıyyesi otuz ikişer akçeden olmak üzre otuz altı bin akçeye bundan akdem vefât eden Eğriboz Kadısı Ömer Efendi b. İbrahim b. Musa’ya hayâtında bizim huzûrumuz[da] bey‘ ve teslîm, ol dahi vech-i muharrer üzre iştirâ ve tesellüm ve kabz etmişdi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe ri‘âyeti şerâiti’l-kabûl şehâdetleri makbûle oldukdan sonra tahakkuk-ı özr-i şer‘î ile müvekkilim mezbûrun meclis-i şer‘a huzûru müte‘azzir olmağın müvekkil-i mezbûr Osman Efendi’yi tahlîf için cânib-i şer‘-i mutahhardan irsâl olunan Ali Efendi b. Hüseyin merkūm Osman Efendi’nin zikri mürûr eden Harrât Kemaleddin mahallesinde vâki‘ menziline varıp, meblağ-ı mezbûr otuz altı bin akçeden kabzı[nı] mu‘terif olduğu altı bin akçeden mâ‘adâ bâkī otuz bin akçeyi müteveffâ-yı mezbûrdan hayâtında ahz u istîfâ ve yâhud taraf-ı şer‘iyyeden bir tarîk ile zimmetini ibrâ eylemediğinden mezbûr İbrahim Efendi muvâcehesinde müvekkil-i mezbûr Osman Efendi’ye yemîn teklîf eyledikde, ol dahi hasbe’l-mes’ûl yemîn billâhi’l-aliyyi’l-a‘lâ eylediği mevlânâ-yı mezbûr ma‘an ba‘s olunan Ebûbekir b. Hüseyin ile meclis-i şer‘a gelip inhâ ve takrîr etmeğin, mûcebiyle meblağ-ı bâkī mezbûr otuz bin akçeyi müteveffâ-yı mezbûrun terekesinden vekîl-i mezbûr Mustafa Efendi ikrâr ve takrîr-i kelâm edip ânifen edâsına tenbîh olunan otuz bin akçemi merkūm İbrahim Efendi bana def‘ ve teslîm, ben dahi müvekkil-i mezbûr için yedinden tamâmen ahz u kabz eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Süleyman Ağa b. Hüseyin, Mehmed Çelebi b. Ali, İbrahim Çelebi b. Receb, Yusuf Ağa b. Abdurrahman, Mehmed Çelebi b. İsmail, Abdurrahman b. Mustafa, es-Seyyid Mehmed b. Mustafa, Mustafa Çelebi b. Hüseyin, Ebûbekir b. Hüseyin.