Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 645 Hüküm no: 506 Orijinal metin no: [119b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Halil’in küçük oğlu İbrahim’e kalan evin ifrazı mümkün olmadığından hissesinin satıldığı Mahmiye-i İstanbul’da Hoca Halil Attâr mahallesinde sâkin iken bundan akdem vefât eden Keresteci el-Hâc Halil b. İbrahim’in mahalle-i mezbûrede vâki‘ bir tarafdan ba‘zan Fâtıma Hatun tasarrufunda olan vakıf menzil ve ba‘zan Cennet Hatun tasarrufunda olan vakıf menzil ve bir tarafdan müteveffâ-yı mezbûrun kebîr oğlu Süleyman ile sagīr oğlu İbrahim’e intikāl-i âdî ile intikāl eden tahta-bend ve iki tarafdan tarîk-i âmma müntehî icâreteyn-i ma‘lûmeteyn ile tasarrufunda olan menzil intikāl-i âdî ile kebîr-i mezbûr Süleyman ve sagīr-i mezbûr İbrahim’e intikāl ettikden sonra mezbûr Süleyman meclis-i şer‘de hâfızü’l-kitâb Mustafa Çelebi b. Mehmed ve vâlidesi işbu Neslihan Hatun bt. Abdülkerim mahzarında ikrâr ve takrîr-i kelâm edip tasarrufumda olan menzil-i mahdûd-ı mezbûrun nısf-ı şâyi‘i mezbûrlara ma‘rifet-i mütevellî ile yüz yetmiş guruş bedel mukābelesinde ferâğ ve tefvîz onlar dahi ber-vech-i iştirâk tefevvüz ve kabûl edip bedel-i ferâğ olan meblağ-ı merkūmu mezbûrlar yedlerinden tamâmen alıp kabz eyledim ba‘de’l-yevm menzil-i mahdûd-ı mezbûrun nısf-ı şâyi‘i mezbûrların tefevvüzlerinde olup ve diledikleri gibi mutasarrıflar olsunlar dedikde gıbbe’t-tasdîk sagīr-i mezbûr İbrahim’in tesviye-i umûruna kıbel-i şer‘den vasiye-i mansûbesi ve vâlidesi olup zâtı mahalle-i mezbûrede sâkin Abdullah Çelebi b. Mehmed ve el-Hâc Mustafa b. Hüseyin ta‘rîfleriyle mu‘arrefe olan Râbia Hatun bt. İbrahim meclis-i şer‘de mezbûr Mustafa Çelebi ve vâlidesi mezbûre Neslihan Hatun mahzarlarında bi’l-vesâye ikrâr ve takrîr-i kelâm edip menzil-i mahdûd-ı mezbûrun nısf-ı şâyi‘i sagīre nef‘ verir vech üzere ifrâz mümkün olmayıp ba‘de’l-müzâyede bedel-i misli ile ve ma‘rifet-i mütevellî ile âhara ferâğ ve tefvîz ve bedel-i ferâğ vech-i şer‘î üzere i‘mâl olunmak sagīr-i mezbûr hakkında evlâ olmağla menzil-i mahdûd-ı mezbûr münâdîlerden Hasan Çelebi b. Mustafa yediyle yetmiş gün mikdârı nidâ ve müzâyede olunup rağabât-ı nâs bi’l-külliye münkatı‘a oldukdan sonra mezbûr Mustafa Çelebi ve vâlidem mezbûre Neslihan üzerlerine üç yüz kırk guruşa karâr edip ziyâde ile tâlib-i âhar zuhûr etmeyip ve meblağ-ı merkūm yevm-i ferâğda menzil-i mahdûd-ı mezbûrun bedel-i misli olduğu mahalle-i mezbûre ahâlîsinden mu‘arrifân-ı mezbûrân Abdullah Çelebi b. Mehmed ve el-Hâc Mustafa b. Hüseyin ve Mehmed b. Süleyman ve Süleyman b. Mehmed ve Abdullah Çelebi b. Mehmed haberleri ile lede’ş-şer‘ zâhir oldukdan sonra bi’l-izni’ş-şer‘î menzil-i mahdûd-ı mezbûrun nısf-ı şâyi‘-i âharını mezbûrlara yüz yetmiş guruş bedel mukābelesinde ma‘rifet-i mütevellî ile ferâğ ve tefvîz onlar dahi tefevvüz ve kabûl edip bedel-i ferâğ-ı mezbûru [120a] mezbûrlar yedlerinden bi-hasebi’l-vesâye tamâmen alıp kabz eyledim ba‘de’l-yevm menzil-i mahdûd-ı mezbûrun nısf-ı şâyi‘-i âharı dahi mezbûrların hakk-ı tefevvüzleri olup diledikleri [gibi] mutasarrıflar olsunlar dedikde gıbbe’t-tasdîk mezbûr Süleyman meclis-i şer‘de mezbûrlar mahzarlarında ikrâr ve takrîr-i kelâm edip eğer karındaşım sagīr-i mezbûr İbrahim ba‘de’l-bülûğ ferâğ-ı mezbûru mahal? olmayıp menzil-i mahdûd-ı mezbûrun nısf-ı şâyi‘ini mezbûrlardan da‘vâ ederlerse vâlidenin makbûzu olan yüz yetmiş guruşa ben kefîl ve zâmin olurum dedikde mâ-vaka‘a kayd şüd. Fî 15 min-Rebî‘ülâhir sene 1110. Şuhûdü’l-hâl: Keresteci Mehmed b. Süleyman, Keresteci Süleyman b. Mehmed, Abdullah Çelebi b. Mehmed, Abdullah Çelebi b. Mehmed, Abdullah, Efendi b. Abdülbaki