Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 646 Hüküm no: 507 Orijinal metin no: [120a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteciler Çarşısı Para Vakfı’ndan aldığı borcu ödemeden vefat eden Hüseyin Ağa’nın terekesinden paranın ödenmesi Mahmiye-i İstanbul’da Keresteciler sûkunun nukūd-ı mevkūfesine hâlâ mütevellî olan Keresteciler Kethüdâsı hâfızü’l-kitâb el-Hâc Hüseyin Ağa b. Hasan meclis-i şer‘de Mahmiye-i mezbûrede Hoca Attâr Halil mahallesi ahâlîsinden olup düyûnu terekesinden ezyed olduğu halde vefât eden Keresteci el-Hâc Ali b. İbrahim b. Sevindik’in tesviye-i umûruna vasî ve kayyım nasb olunup zâtı ta‘rîf-i şer‘î ile mu‘arrefe zevce-i menkûha-i metrûkesi Râbia Hatun bt. İbrahim mahzarında bi’t-tevliye üzerine da‘vâ ve takrîr-i kelâm edip müteveffâ-yı mezbûr el-Hâc Ali b. İbrahim b. Sevindik târîh-i fevtinden on bir sene mukaddem Keresteciler sûkunun nukūd-ı mevkūfesine mütevellî olan el-Hâc Mehmed b. Abdullah yedinden asl-ı mal-ı vakıfdan huzûr-ı Müslimînde yüz elli guruş istidâne ve kabz ve deyn-i merkūmu nâtık imzâ ve hatmiyle mümzâ ve mahtûm temessük verdikden sonra ben meblağ-ı merkūmu tevliyetim hasebiyle yüz dokuz senesinde müteveffâ-yı mezbûrdan taleb eylediğimde meblağ-ı merkūmu bana sâhh? olmadan fevt olmağla terekesine vaz‘-ı yed eden vasiye-i mezbûreden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden Çukur mahallede sâkin Yahya Çelebi b. Ömer ve el-Hâc Mehmed b. İsmail ve Sûfî el-Hâc Ahmed b. Abdullah li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müteveffâ-yı mezbûr Keresteci el-Hâc Ali b. İbrahim b. Sevindik târîh-i fevtinden on bir sene mukaddem mütevellî-i ma‘zûl el-Hâc Mehmed b. Abdullah yedinde olan asl-ı mal-ı vakıfdan huzûrumuzda yüz elli guruş istidâne ve kabz edip işbu deyn temessükünü def‘ eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd şüd. Fî 18 min-Rebî‘ülâhir sene 1110. Şuhûdü’l-hâl: Mustafa Çelebi b. Osman, el-Hâc Yusuf b. Abdurrahman, Mehmed Efendi b. Sunullah, Hüseyin Ağa b. İbrahim