Bab Mahkemesi 54 Numaralı Sicil (H. 1102 / M. 1691) cilt: 20, sayfa: 54 Hüküm no: 6 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Hacı Mehmed ile Ali Reis b. Mustafa’nın eşya davasında sulh oldukları Mahmiye-i İstanbul’da Sultan Süleyman -aleyhi’r-rahmetü ve’l-gufrân- Câmi‘-i şerîfi kurbunda sâkine Hatice bt. el-Hâc Mehmed nâm hâtunun babası ve tarafından husûs-ı âti’l-beyânı ikrâra vekîl olduğu zât[ı] ma‘rifet-i şer‘iyye ile ârifân İbrahim Beşe b. Musa ve Veli Beşe b. Ali şehâdetleri ile vekâleti sâbite olan mezbûr el-Hâc Mehmed b. Hasan meclis-i şer‘-i şerîf-i enverde, işbu bâ‘isü’l-kitâb Ali Reis b. Mustafa mahzarında ikrâr ve takrîr-i kelâm edip, mezbûr Ali Reis târih-i kitâbdan on ay mukaddem müvekkile-i gāibe ani’l-meclis Ayşe bt. Ahmed nâm hâtunu bu gece senin menzilinde sâkine olsun deyu getirip, Ayşe mezbûre dahi ol gece sâkine oldukdan sonra kızım müvekkile-i mezbûrenin on guruş kıymetli bir incili tarbuş ve on guruş kıymetli bir incili saçlık ve beş guruş kıymetli bir mor çuka ferâce ve iki buçuk guruş kıymetli bir gömlek ve bir don ve dört [guruş] kıymetli bir sîm kuşak ve nakid üç esedî guruşunu ahz ve firâr etmekle, mezbûr Ali Reis’e sen gāibe-i mezbûre Ayşe’nin şerîkisin deyu eşyâ-i merkūmenin kıymet-i şer‘iyyelerinden bundan akdem taleb ve da‘vâ eylediğimde, beynimizde münâza‘ât-ı kesîre ve muhâsamât-ı şedîde vukū‘undan sonra muslihûn tavassut edip, müvekkilem mezbûreyi da‘vâ-yı merkūmesinden merkūm Ali Reis ile bin üç yüz akçe üzerine sulh eyledikde, ol dahi sulh-ı mezbûru kabûl ve bedel-i sulh olan meblağ-ı mezbûru merkūm Ali yedinden tamâmen ahz u kabz eyleyip, ba‘de’l-yevm husûs-ı mezbûra müte‘allika âmme-i da‘vâdan mezbûr Ali Reis’in zimmetini ibrâ-i âmm-ı râfi‘ü’l-hisâmla ibrâ ve iskāt eyledi dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min şehri Cemâziyelevvel li sene isneteyn ve mi’e ve elf. Şuhûdü’l-hâl: Ahmed Efendi el-imâm, Derviş Beşe b. Ahmed, Hasan Beşe b. Seydî Ali, Mehmed Efendi b. İbrahim, İbrahim Çelebi b. Ahmed, İbrahim Çelebi b. Ahmed ve gayruhüm.