Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 659 Hüküm no: 518 Orijinal metin no: [122a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Nasuh’un hayatta iken cariyesi Safiye’yi azat edip evlendiği Kezâlik müteveffâ-yı mezbûrun zevce-i menkûha-i metrûkesi bâ‘isetü’l-vesîka Safiye [bt.] Abdullah nâm hatun ba‘de’t-ta‘rîfi’ş-şer‘î meclis-i ma‘kūd-ı mezbûrda müteveffâ-yı mezbûrun tesviye-i umûruna vasiyy-i muhtârı olmağla terekesine vaz‘-ı yed eden li-ebeveyn karındaşı oğlu Süleyman Çelebi b. Hüseyin mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Ahmed b. Nasuh b. Mehmed hâl-i kemâl-i sıhhatinde târîh-i fevtinden on sene mukaddem yedinde câriye-i memlûkesi olduğum halde beni malından âzâd edip elli guruş mehr-i müeccel tesmiyesiyle huzûr-ı Müslimînde beni tezevvüc ve kabûl etmekle akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı Müslimînden Abdülbaki b. el-Hâc Musa ve el-Hâc Hüseyin b. el-Hâc Yusuf li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr hâl-i kemâl-i sıhhatinde fevtinden on sene mukaddem bizim huzûrumuzda müdde‘iye-i mezbûre Safiye’yi malından âzâd ve elli guruş mehr-i müeccel tesmiyesiyle tezevvüc ve kabûl eyledi, biz bu husûsa ilâ-[âhirihî]. Şuhûdü’s-sâbikūn