Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 662 Hüküm no: 523 Orijinal metin no: [123a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Abdullah’ın Sebiha adlı cariyesini hayatta iken azat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘den Mevlânâ Şems Ahmed Efendi irsâl ol dahi mahmiye-i İstanbul’da Âşık Paşa mahallesinde sâkin iken bundan akdem vefât eden Macar Hasan Ağa b. Abdullah’ın menziline varıp zeyl-i vesîkada muharrerü’l-esâmî olan Müslimîn huzûrlarında akd-i meclis-i şer‘-i şerîf eyledikde müteveffâ-yı mezbûrun verâseti zevce-i menkûhaları Bağıcinan Hatun bt. Abdullah ve Ümmühani bt. Abdullah ve sagīr oğlu Hasan’a münhasıra oldukdan sonra müteveffâ-yı mezbûra rıkka-i sâbıkını ma‘rûfe işbu açık kaşlı Rusiyyetü’l-asl Sebiha bt. Abdullah meclis-i ma‘kūd-ı mezbûrda sagīr-i mezbûrun vasîsi el-Hâc Hüseyin Ağa b. Mahmud mahzarında da‘vâ ve takrîr-i kelâm edip müteveffâ-yı mezbûr Macar Hasan Ağa b. Abdullah fevtinden bir sene mukaddem beni malından tahrîr ve i‘tâk etmekle ben hürre olmuş iken vasiyy-i mezbûr mâni‘ olur suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı Müslimînden Üsküdar’da Vâlide Sultan mahallesinde sâkin Mehmed Ağa b. Hasan ve İbrahim b. Muharrem li-ecli’ş-şehâde meclis-i ma‘kūd-ı mezbûra hâzırân [olup] isre’l-istişhâd fi’l-hakīka müteveffâ-yı mezbûr Macar Hasan Ağa b. Abdullah fevtinden bir sene mukaddem bizim huzûrumuzda işbu mevsûfe-i mezbûreyi malından tahrîr ve i‘tâk eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı [mezbûr] mahallinde ketb ü tahrîr ba‘dehû ma‘an mürsel Ahmed Çelebi b. Süleyman ile meclis-i şer‘a gelip vukū‘u üzere inhâ ve takrîr etmeğin kayd şüd. Fî 15 min-Cumâdelevvel sene 1110. Şuhûdü’l-hâl: Bekir Ağa b. Yusuf, Mehmed Çelebi b. Nasuh, Mustafa b. Ali, Hüseyin b. (°)