Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 667 Hüküm no: 529 Orijinal metin no: [123b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin oğlu Süleyman’a nafaka takdiri Mahmiye-i İstanbul’da Haraccı Muhyiddin mahallesi ahâlîsinden iken bundan akdem vefât eden Hâfız Mehmed Efendi b. Ahmed’in sulbî sagīr oğlu Süleyman’ın vâlidesi ve hâdinesi bâ‘isü’l-kitâb fahrü’l-muhadderât Şerife Fâtıma Hatun bt. Ali meclis-i şer‘de zâtı ba‘de’t-ta‘rîfi’ş-şer‘î takrîr-i kelâm ve ta‘bîr ani’l-merâm edip hâdinesi olduğum sagīr-i mezbûr Süleyman’a babası müteveffâ-yı mezbûrdan müntakil malından kadr-ı ma‘rûf nafaka ve kisve-bahâ farz ve takdîr olunmak murâdımdır dedikde hâkim-i muvakkı‘-ı sadr-ı kitâb efendi hazretleri sagīr-i mezbûr Süleyman’a babası müteveffâ-yı mezbûrdan müntakil malından târîh-i kitâbdan beher para üçer akçeye olmak üzere yevmî yirmi akçe nafaka farz ve takdîr edip meblağ-ı mefrûz-ı mezbûru harc ü sarfa ve vakt-i zarûretde istidâneye lede’z-zafer malına rücû‘a izin verilmeğin mâ-vaka‘a kayd şüd. Fî gurre-i Rebî‘ülâhir sene 1110. Şuhûdü’l-hâl: Fahrü’l-kuzât Mehmed Efendi b. Abdi, Ahmed Efendi b. (°) el-imâm, Mehmed Çelebi b. Hasan, Mustafa Çelebi b. Mehmed