Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 668 Hüküm no: 531 Orijinal metin no: [124a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed’in oğlu Abdülahad’a nafaka takdiri İstanbul’da Kabasakal Şa‘bân Ağa mahallesinden olup Mekke-i mükerremeden gelir iken bundan akdem vefât eden el-Hâc Ahmed b. Mehmed’in sagīr oğlu Abdülahad’in tesviye-i umûruna bâ-hüccet-i şer‘iyye vasiyy-i muhtârı olan râfi‘ü’l-kitâb Kayyım Mustafa Çelebi b. Osman meclis-i şer‘de takrîr-i kelâm edip sagīr-i mezbûr nafaka ve kisve-bahâya muhtâc olmağın mutasarrıf olduğu cihâtı vazîfelerinden kadr-ı ma‘rûf câriyesiyle ma‘an nafaka farz ve takdîr olunmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbık olduğu zeyl-i kitâbda muharrerü’l-esâmî Müslimîn ihbârlarıyla lede’ş-şer‘ mütebeyyen oldukdan sonra hâkim-i muvakkı‘-ı sadr-ı kitâb efendi hazretleri dahi sagīr-i mezbûra vech-i muharrer mutasarrıf olduğu cihâtı vazîfelerinden târîh-i terkîmden yevmî beş para nafaka farz ve takdîr şüd. Gurre-i Cumâdelûlâ sene 1110. Şuhûdü’l-hâl: Mehmed Efendi b. Şa‘bân, el-Hâc Abdullah Çelebi b. Şa‘bân, el-Hâc Ahmed Ağa b. Mehmed, Abdullah b. Abdullah