Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 668 Hüküm no: 532 Orijinal metin no: [124a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa’nın oğlu İsmail üzerine yeni vasi ve nazır tayin edilerek hesabının görüldüğü Mahmiye-i İstanbul’da Hasan Paşa mahallesi ahâlîsinden olup Dergâh-ı âlî yeniçerilerinin kırk altıncı bölük çorbacısı iken sefer-i hümâyûnda vefât eden Mehmed Ağa b. Ali Bey’in sulbî sagīr oğlu İsmail’in tesviye-i umûruna vasiyy-i muhtârı sâbıkā Sekbanbaşı Mehmed Ağa b. el-Hâc Mustafa fevt olup ve âhar vasiyy-i muhtârı Abdülbaki Çelebi b. Mehmed gayr-ı kâfi ve emr-i vesâyet mu‘attal olmağın abd olup vesâyet-i mezbûre uhdesinden gelmeye liyâkati ihbâr olunan hâfızü’l-kitâb Mehmed Ağa b. Receb’i hâkim-i muvakkı‘-ı sadr-ı kitâb efendi hazretleri sagīr-i mezbûrun tesviye-i umûruna vasî ve üzerine müteveffâ-yı mezbûr Sekbanbaşı Mehmed Ağa’nın li-eb karındaşı fahrü’l-akrân Hasan Ağa’yı nâzır nasb buyurduklarında onlardan her biri vesâyet-i mezbûre ve nezâret-i mezbûreyi müte‘ahhid oldukdan sonra vasiyy-i mezbûr Mehmed Ağa mahfil-i kazâda merhûm-ı müşârün-ileyh Sekbanbaşı Mehmed Ağa’nın evlâd-ı sıgārının tesviye-i umûruna vasiyy-i muhtârı olmasıyla terekesine vaz‘-ı yedi muhakkak olan mezbûr Hasan Ağa mahzarında ikrâr ve takrîr-i kelâm edip vasiyy-i mezbûr Sekbanbaşı Mehmed Ağa’nın sagīr-i mezbûr İsmail’in mal-ı müntakilinden makbûz ve masrûfunun hesâbı görüldükde yedinde bâkī kalan ber-mûceb-i defter-i hesâb bin otuz sekiz guruşu sagīr-i mezbûrun malından olmak üzere mezbûr Hasan Ağa’nın yedinden tamâmen kabz edip meblağ-ı mezbûrdan yedinde bir akçe kalmadı dedikde mâ-vaka‘a kayd şüd. Fî 16 min-Cumâdelûlâ sene 1110. Şuhûdü’l-hâl: el-Hâc Mehmed Ağa b. (°), Musa Efendi b. Yusuf, Ahmed Çelebi b. Mehmed, İbrahim Ağa b. Hüseyin, Mehmed b. Ahmed