Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 669 Hüküm no: 533 Orijinal metin no: [124a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçıbaşı Ali’nin kızı Ayşe’ye nafaka takdiri Mahmiye-i İstanbul’da Altıboğça mahallesinde sâkin olup Mısr-ı Kāhire’de bundan akdem vefât eden Aşçıbaşı el-Hâc Ali b. Hasan’ın sulbiye sagīre kızı Âişe’nin vâlidesi ve hâdinesi râfi‘atü’l-kitâb İsmihan Hatun bt. Abdullah meclis-i şer‘de takrîr-i kelâm edip hâlâ bi-hakkı’l- hıdâne hacr ü terbiyemde olan sagīre-i mezbûre Emetullah’ın babasından müntakil malından kadr-ı ma‘rûf nafaka farz ve takdîr olunması matlûbumdur hâkim-i muvakkı‘-ı sadr-ı kitâb vâlidesi mezbûre talebiyle beher yevm sekizer sağ akçe nafaka farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisve ve sâir havâyic-i mühimmesine harc ü sarfa ve lede’l-iktizâ istidâne ve inde’z-zafer mal-ı müntakiline rücû‘a mezbûre Ümmühan’a izin birle mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Cumâdelûlâ li-sene aşer ve mi’e ve elf. Şuhûdü’l-hâl: Mehmed Efendi b. Ahmed el-imâm, Mehmed Çelebi b. el-Hâc Ali, Hasan b. Abdullah, el-Hâc Ömer b. Hasan