Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 671 Hüküm no: 535 Orijinal metin no: [124b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın ölen Karabet’te kahve ücretinden alacağı olduğu Mahmiye-i İstanbul’da Mercan Ağa Câmi‘-i şerîfi civârında sâkin râfi‘ü’l-kitâb Hasan Ağa b. Mehmed meclis-i şer‘de mahmiye-i mezbûrede Şeyh Ferhad mahallesinde sâkin iken bundan akdem düyûnu terekesinden ezyed olduğu halde hâlik olan Karabet v. Sakar v. Hüdaverdi nâm zimmînin beyne’l-guremâ husûmet ve redd-i cevâba kıbel-i şer‘den vasiyy-i mansûbu Yani v. Agbal nâm zimmî mahzarında üzerine da‘vâ ve takrîr-i kelâm edip hâlik-i merkūm Karabet v. Sakar v. Hüdaverdi zimmetinde yedimde müşterâ ve makbûz vezni ve vasfı beynimizde ma‘lûm kahve bahâsından işbu yedimde olan deyn temessükü nâtık olduğu üzere altı bin yedi yüz guruş hakkım olup meblağ-ı mezbûrun bin yedi yüz guruşunu hâlik-i mezbûrun hayâtında ahz u kabz edip meblağ-ı bâkī beş bin guruş hakkımı hâl-i kemâl-i sıhhatinde cihet-i mezbûreden zimmetinde bana deyni olduğunu iki ay mukaddem huzûr-ı Müslimînde ikrâr ettikden sonra kable’l-edâ fevt olup zimmetinde olmağın yed-i vaz‘ında olan tereke-i kāsırasından taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ricâl-i Müslimînden Tophane’de Firuz Ağa mahallesinde sâkin Topçuyân Kâtibi Mehmed Efendi b. Osman mahmiye-i mezbûrede Nişancı Paşa-i Atîk mahallesinde sâkin Yusuf Efendi etbâ‘ından Hasan Bey b. Mehmed li-ecli’ş-şehâde meclis-i şer‘de hâzırân olup işhâd olunduklarında fi’l-hakīka hâlik-i merkūm Karabet v. Sakar v. Hüdaverdi hâl-i kemâl-i sıhhatinde vezni ve vasfı beynlerinde ma‘lûm kahve bahâsından ba‘de külli’l-hesâb meblağ-ı bâkī mezbûr beş bin guruş müdde‘î-i mezbûr Hasan Ağa’ya zimmetimde deynimdir deyü bundan iki ay mukaddem huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde şâhidân-ı mezbûrânı tezkiye içün savb-ı şer‘den irsâl olunan fahrü’l-müderrisîn Abdurrahim b. el-müvellâ el-merhûm Ahmed Efendi evvelâ zikr olunan Nişancı Paşa-i atîk mahallesine varıp mezbûr Hasan Bey’in keyfiyet-i ahvâlini suâl eyledikde mahalle-i mezbûre ahâlîsinden Abdullah Efendi b. Mehmed ve İsmail Çelebi b. Hasan ve Mustafa Çelebi b. Mansur ve Ömer Çelebi b. Mehmed ve sâniyen Tophane’de zikr [125a] olunan Firuz Ağa mahallesine varıp mezbûr Mehmed Efendi b. Osman’ın keyfiyet-i ahvâlini suâl eyledikde mahalle-i mezbûre ahâlîsinden Mustafa Ağa b. Mehmed ve Ahmed Ağa b. Hasan ve Mehmed Çelebi b. Musa ve İshak Çelebi b. Yakub ve Yusuf Bey b. Abdülfettah ve Hamza Efendi b. Nasrullah nâm kimesneler mezbûrân içün her biri adl ve makbûlü’ş-şehâdelerdir deyü haber verdiklerini mezbûr Abdurrahman Efendi mahallinde tahrîr ba‘dehû ma‘an irsâl olunan İbrahim Çelebi b. Mehmed ve Ahmed b. Ali ile meclis-i şer‘a gelip takrîr edip gıbbe’t-tahlîfi’ş-şer‘î mûcebince ba‘de’l-hükm mâ-vaka‘a bi’t-taleb ketb olundu. Fî 12 min-Cumâdelûlâ sene 1110. Şuhûdü’l-hâl: İmâmzâde Mehmed Efendi b. Ahmed, fahrü’l-müderrisîn es-Seyyid Abdülmuin Efendi, fahrü’l-müderrisîn Yahya Efendi b. Ahmed, fahrü’l-müderrisîn Mir Ali Efendi b. Yusuf eş-şehîr bi-Rif‘atî en-nâib-i kahve, Nükâtî Ali Efendi b. Osman