Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 672 Hüküm no: 536 Orijinal metin no: [125a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marat v. Anastaş’ın ölmüş olan Karabet’te aralarındaki ticaretten dolayı alacağı olduğu Mahmiye-i İstanbul’da Vâlide Hanı’nda sâkin bâ‘isü’s-sifr Marat v. Anastaş nâm zimmî mahfil-i kazâda berât-ı zîşân ile askerî olup mahmiye-i mezbûrede Şeyh Ferhad mahallesi ahâlîsinden olup düyûnu terekesinden ezyed olduğu halde hâlik olan Karabet v. Sakar v. Hüdaverdi nâm zimmînin veresesi, terekesinden kasr-ı yed etmekle tesviye-i umûruna guremâsıyla husûmet ve redd-i cevâba vasî ve kayyım nasb olunmağla terekesine vaz‘-ı yed eden Yani v. Agbal nâm zimmî mahzarında üzerine da‘vâ ve takrîr-i kelâm edip hâlik-i mezbûr Karabet v. Sakar v. Hüdaverdi bin yüz beş senesinde menzilinde malından on yedi bin üç yüz on sekiz guruş ihrâc ben dahi malımdan on üç bin dokuz [yüz] doksan altı guruş ihrâc ve halt edip vücûh-ı ticâretde hâsıl olan fâide res’-i malımıza göre inkısâm olmak üzere akd-i şirket edip ba‘dehû yine medîne-i Ankara’dan meblağ-ı mezbûr ile otuz bin sekiz yüz on dört guruşa sof ipliği iştirâ edip bir mikdârını İstanbul’da hâlik-i mezbûra bir mikdârını İzmir’de vekîli Yani nâm zimmîye irsâl edip ol dahi ba‘de’l-kabz ve’s-sarf işbu bin yüz on Rebi‘ü’l-âhirenin yirminci gününde Kuruçeşme’de Saltana nâm Nasrâniye’nin menzilinde hesâb görüp her birimiz asl-ı malımızı kabz ve fesh-i akd-i şirket eylediğimizden sonra re’s-i malımıza göre nemâdan benim hisseme âid olan iki bin beş yüz guruşu hâlik-i mezbûr Karabet alıp kabz edip mesârifine sarfla istihlâk eyledim, zimmetimde bana vâcibü’l-edâ ol kadar guruş deyni olduğunu mezbûr Karabet alâ-ruûsi’l-işhâd ikrâr ve işhâd edip kable’l-edâ hâlik olmağla terekesinden taleb ederim suâl olunsun dedikde gıbbe’s-suâl vasiyy-i mezbûr cevâbında tereke-i hâlik-i mezbûra vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda mahmiye-i mezbûrede Dâye Hatun mahallesinde sâkin Ali Efendi b. Yusuf ve zikr olunan Şeyh Ferhad mahallesinde sâkin Şahin v. Kosta [nâm] kimesneler li-ecli’ş-şehâde meclis-i şer‘a hâzırân olup işhâd olunduklarında fi’l-vâki‘ hâlik-i mezbûr Karabet v. Sakar v. Hüdaverdi işbu bin yüz on Rebî‘ülâhirinin yirminci gününde Kuruçeşme’de Saltana nâm Nasrâniyenin menzilinde işbu müdde‘î-i mezbûr Marat v. Anastaş ile hesâb görüp fesh-i akd-i şirket eylediklerinde her birleri asl-ı maldan ba‘de’l-kabz müdde‘î-i mezbûrun re’s-i malına göre hissesine âid olan iki bin beş yüz guruşu ben ahz u kabz ve mesârifime sarfla istihlâk eyledim, zimmetimde müdde‘î-i mezbûr Marat zimmîye vâcibü’l-edâ deynimdir deyü huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîli’l-mu‘teber şehâdetleri makbûle oldukdan sonra meblağ-ı mezbûru hayâtında yedinden veyâ vekîli yedinden alıp mukābelesinde rehin veyâ âhara havâle etmeyip ve bi’l-cümle turuk-ı şer‘iyyeden bir tarîk ile zimmetini ibrâ etmediğine müdde‘î-i mezbûra yemîn teklîf ol dahi alâ-vefki’l-mesûl yemîn billâhillezî enzele’l-İncîle alâ-Îsâ -aleyhisseslâm- etmeğin mûcebiyle ba‘de’l-hükm mezbûr Marat mahfil-i kazâda vasiyy-i mezbûr Yani mahzarında takrîr-i kelâm edip ânifen edâsına hükm-i şer‘î lâhık olan iki bin beş yüz guruşdan mâ‘adâ hâlik-i mezbûrun İzmir’de ve mahmiye-i mezbûrede mezbûr malının dahi zikr olunan mevzi‘lerde olup zimem-i nâsda olan hukūklarına müte‘allık kat‘an alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a kayd şüd. Fî 11 min-Cumâdelûlâ sene 1110. Şuhûdü’l-hâl: İmâmzâde Mehmed Efendi b. Ahmed, fahrü’l-müderrisîn Abdurrahman Efendi b. Ahmed, Yahya Efendi b. Mustafa, Rif‘atî Ali Efendi b. Yusuf, İbrahim Çelebi b. Mehmed ve gayruhum