Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 693 Hüküm no: 553 Orijinal metin no: [128b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefatıyla terekenin yarısının hanımına yarısının da beytülmâle kaldığı Husûs-ı âti’l-beyânın mahallinde ketb ü tahrîri iltimâs olunmağın cânib-i şer‘den Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Mesihpaşa-i atîk mahallesinde Ahmed Ağa b. Abdullah’ın menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i şerîf ettikde mahalle-i mezbûrede sâkine iken bundan akdem vefât eden Âişe Hatun bt. Abdullah b. Abdullah’ın zâhirde zevc-i metrûku merkūm Ahmed Ağa’dan gayrı vâris-i ma‘rûfu olmamağla terekesinin nısfı mezbûr Ahmed Ağa’ya ve nısf-ı âharı cânib-i beytülmâle âid oldukdan sonra Mahmiye-i mezbûrede bi’l-fi‘il Beytülmâlü’l-hâs Emîni fahrü’l-a‘yân Mustafa Ağa b. Abdülmennan meclis-i mezkûrda tereke-i müteveffâ-yı mezbûra bi’l-verâse vaz‘-ı yed eden hâfızü’l-kitâb merkūm Ahmed Ağa muvâcehesinde bi’l-emâne ikrâr ve takrîr-i kelâm edip müteveffât-ı mezbûrenin terekesi tahrîr ve ba‘de ihrâci’l-mesârif işbu defter-i kassâm-ı askerî nâtık olduğu üzere bâkī kalan para üçer akçe hesâbı üzere elli dokuz bin beş yüz yetmiş sağ akçeden cânib-i beytülmâle âid olan yirmi dokuz bin yedi yüz yetmiş beş akçeyi terekeden olmak üzere mezbûr Ahmed Ağa yedinden tamâmen ahz u kabz eyleyip bâkī bir akçe ve bir habbe hakkım kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Mehmed b. Hüseyin ve Mustafa b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 12 min-Rebî‘ülâhir sene 1110. Şuhûdü’l-hâl: Şa‘bân Efendi b. Abdullah, Mustafa Efendi b. İbrahim, Mustafa Efendi b. Nimetullah, Osman Efendi b. İbrahim