Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 693 Hüküm no: 554 Orijinal metin no: [129a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vasiyetini yerine getirmek üzere eşi Ahmed Ağa’yı vasi tayin ettiği Kezâlik cânib-i beytülmâle âid oldukdan sonra müteveffât-ı mezbûrenin zikri âtî üzere vesâyetini tenfîze vasiyy-i muhtârı olduğunu iddi‘â eden hâfızü’l-kitâb mezbûr Ahmed Ağa meclis-i ma‘kūd-ı mezbûrda mahmiye-i mezbûrda bi’l-fi‘il emîn-i beytülmâl olmağın müteveffât-ı mezbûrenin terekesine bi’l-emâne vaz‘-ı yed edip kıbel-i şer‘den husûmet ve redd-i cevâba me’zûn olan fahrü’l-a‘yân Mustafa Ağa b. Abdülmennan mahzarında üzerine da‘vâ ve takrîr-i kelâm edip zevcem müteveffât-ı mezbûre Âişe Hatun bt. Abdullah b. Abdullah hâl-i marazında fevtinden yirmi gün mukaddem bi-emrillâhi te‘âlâ kazâ-i nahb eylediğinde terekenin sülüsünden elli guruş ifrâz olunup meblağ-ı mezbûrun yirmi guruşu ıskāt-ı salâtım içün fukarâya tasadduk oluna ve otuz guruşu senin re’yin ile istirbâh ve istiğlâl olunup hâsıl olan nemâsı ehl-i Kur’ân’dan bir racül-i sâlihe verilip ol dahi mahalle-i mezbûre mescid-i şerîfinde her gün Kur’ân-ı azîmden bir cüz’-i şerîf tilâvet edip sevâbını rûhuma ihdâ eyleye deyü vasiyet edip beni huzûr-ı Müslimînde tenfîzine vasiyy-i muhtâr nasb ü ta‘yîn ettikde ben dahi muvâcehesinde ba‘de’l-kabûl musırraten-aleyhâ fevt olup terekesinin sülüsü meblağ-ı mûsâ-bih-i mezbûra müsâ‘id olmağla tenfîz-i vesâyâ-yı mezbûr eylediğinde emîn-i merkūm mâni‘ olur suâl olunsun dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline beyyine taleb olundukda udûlden mahalle-i mezbûre sükkânından Mustafa Efendi b. Nimetullah ve İbrahim Ağa b. Sefer li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffât-ı mezbûre Âişe Hatun bt. Abdullah b. Abdullah hâl-i marazında fevtinden yirmi gün mukaddem bi-emrillâhi te‘âlâ kazâ-i nahb eylediğimde terekenin sülüsünden elli guruş alıp ifrâz olunup meblağ-ı mezbûrun yirmi guruşu ıskāt-ı salâtım içün fukarâya tasadduk oluna ve otuz guruşu zevcim mezbûr Ahmed Ağa’nın re’yi ile istirbâh olunup hâsılı olan nemâsı ehl-i Kur’ân’dan bir racül-i sâliha verilip ol dahi mahalle-i mezbûre mescid-i şerîfinde Kur’ân-ı azîmden bir cüz’-i şerîf tilâvet edip sevâbını rûhuma ihdâ eyleye deyü huzûrumuzda vasiyet ve tenfîzine zevci müdde‘î-i mezbûru vasiyy-i muhtâr nasb ü ta‘yîn eyledikde ol dahi muvâcehesinde ba‘de’l-kabûl musırraten-aleyhâ fevt olup terekenin sülüsü meblağ-ı mûsâ-bih-i mezbûra müsâ‘iddir, biz bu husûsa ilâ-âhirihî. Hurrire fi’t-târîhi’l-mezbûr li-seneti’l-merkūme. Şuhûdü’s-sâbikūn