Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 695 Hüküm no: 556 Orijinal metin no: [129a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Esirci Mustafa’ya borcu olan Mehmed Bey’in kefillerinin borcu ödemesi Mahmiye-i İstanbul’da Altıboğça mahallesinde sâkin iken düyûnu terekesinden ezyed olduğu halde vefât eden Esirci el-Hâc Mustafa b. Pehlivan el-Hâc Osman b. İbrahim’in veresesi terekesinden kasr-ı yed etmeleriyle tereke-i kāsırasını kabz ve düyûn-ı müsbetesini edâya taraf-ı şer‘den vasî ve kayyım nasb olunan eniştesi el-Hâc Mehmed b. el-Hâc İbrahim meclis-i şer‘-i şerîfde mahrûse-i Galata’ya tâbi‘ kasaba-i Beşiktaş’da sâkin Abdullah Kapudan ve Ali Kapudan ibney Vardiyanbaşı Mehmed Kapudan nâm kimesneler mahzarlarında üzerlerine bi’l-vesâye da‘vâ ve takrîr-i kelâm edip yedimde olan işbu mümzâ ve mahtûm deyn temessükü mûcebince müteveffâ-yı mezbûr el-Hâc Mustafa’nın beynlerinde ma‘lûm sarık bahâsından mezbûrânın karındaşları gāib ani’l-meclis Mehmed Bey zimmetinde yüz yirmi iki buçuk guruş hakkı olmağla mezbûrân Abdullah ve Ali Kapudan her biri meblağ-ı mezbûra tarafeynden emir ve kabûlü hâviye kefâlet-i tâmme ile kefîl oldukdan sonra deyn-i mezbûru kable’l-istîfâ mezbûr el-Hâc Mustafa fevt olmağın hâlâ kefâletlerine binâen meblağ-ı mezbûru mezbûrândan taleb ederim suâl olunsun dedikde gıbbe’s-suâl mezbûrân Abdullah ve Ali Kapudan cevâblarında kaziyye vech-i muharrer üzere olup birâderleri mezbûr Mehmed Bey’in temessük mûcebince müteveffâ-yı mezbûra deyni olan meblağ-ı mezbûr yüz yirmi iki buçuk guruşa her biri kefîl olduklarını ikrâr lâkin müteveffâ-yı mezbûr hayâtında meblağ-ı mezbûrun seksen iki buçuk guruşunu asîl-i mezbûr Mehmed Bey’den ve bâkī kırk guruşunu bizden tamâmen ahz u kabz etmekle asîl-i mezbûrun ve bizim dahi deyn-i mezbûrdan zimmetimiz berî olmuşdur deyü def‘le mukābele edicek gıbbe’l-inkâr mezbûrândan def‘-i mezbûra muvâfıka beyyine taleb olundukda kirâren ve mirâren ba‘de’l-istimhâl mehil-i şer‘î verilip ba‘dehû kefîlân-ı mezbûrân ityân-ı beyyineye kādirler olmayıp [yemîn] teklîf dahi lâzım gelmemeğin mûcebince bi-hükmi’l-kefâle meblağ-ı mezbûr yüz yirmi iki buçuk guruşu müdde‘î-i mezbûra edâ ve teslîme mezbûrân Abdullah Kapudan ve Ali Kapudan’a ba‘de’t-tenbîh mâ-vaka‘a kayd şüd. Fî 20 Cumâdelûlâ sene 1110. Şuhûdü’l-hâl: Ali Çavuş b. Çukadâr el-Hâc Süleyman b. Mehmed, Uşşâkī Mehmed Efendi, Rûşenî Mehmed Efendi b. (°), Ali Odabaşı b. Hasan, Hüseyin Çelebi b. Hasan, Ahmed Çelebi b. Süleyman, Hüseyin Çelebi b. Mehmed