Bab Mahkemesi 54 Numaralı Sicil (H. 1102 / M. 1691) cilt: 20, sayfa: 59 Hüküm no: 11 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müstesnâ bt. Abdullah’ın ölen kocası Mustafa b. Hamza’da olan mehir alacağı için kayınbiraderi Mehmed Beşe ile sulh olduğu Mahmiye-i İstanbul’da Yenikapı dâhilinde Çukur mahallesi sâkinlerinden iken bundan akdem vefât eden Mustafa b. Hamza b. Abdullah’ın verâseti, zevce-i metrûkesi Müstesnâ bt. Abdullah nâm hâtun ile li ebeveyn er kardeşi Mehmed Beşe’ye münhasıra olduğu şer‘an zâhir ve mütehakkik oldukdan sonra mezbûre Müstesnâ meclis-i şer‘-i şerîf-i enver ve mahfil-i dîn-i münîf-i ezherde, bâ‘isü hâze’l-kitâb mezbûr Mehmed Beşe mahzarında ikrâr ve takrîr-i kelâm edip, mezbûr Mehmed Beşe zevcim müteveffâ-yı mezbûrun terekesine vâzı‘u’l-yed olmağla, zimmetinde mütekarrir ve ma‘kūdun aleyh olan iki bin yedi yüz akçe mehr-i müeccelimi mezbûr Mehmed Beşe’den taleb ve da‘vâ eylediğimde, beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûremden beni mezbûr Mehmed Beşe ile altı yüz akçe üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr altı yüz akçeyi mezbûr Mehmed Beşe yedinden tamâmen ahz u kabz eyledim. Ba‘de’l-yevm husûs-ı mezbûre ve tereke-i müteveffâ-yı mezbûra müte‘allika âmme-i da‘vâdan mezbûr Mehmed Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mustafa Beşe b. Mehmed, Mehmed Beşe b. Abdullah, Ahmed Çelebi b. Mehmed, Ebûbekir b. Hüseyin, Ali Çelebi b. Bâli.