Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 714 Hüküm no: 572 Orijinal metin no: [133a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın hayatta iken vasiyetini yerine getirmek üzere Hüseyin Ağa’yı tayin ettiği Kezâlik sagīr oğlu Hüseyin’e münhasıra oldukdan sonra müteveffâ-yı mezbûrun vech-i âtî üzere vasiyy-i muhtârı olduğunu iddi‘â eden mahmiye-i mezbûrede Kumkapı kurbünde Nişancı mahallesinde sâkin Hüseyin Ağa b. Mahmud meclis-i ma‘kūd-ı mezbûrda müteveffâ-yı mezbûrun terekesine vâzı‘atü’l-yed olan zevcesi mezbûre Bağıcinan bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Macar Hasan Ağa b. Abdullah fevtinden üç gün mukaddem hasta ve alîl olduğu halde bi-emrillâhi te‘âlâ kazâ-i nahb eylediğimde cemî‘ malımın sülüsü ifrâz olunup meblağ-ı mefrûz-ı mezbûrdan altmış guruş ile vech-i mesnûn üzere levâzım-ı techîz ve tekfînim görülüp ve iki bin bir akçe ile ıskāt-ı salât ve kefâret-i savm ve yemînim oluna ve yirmi guruş ile iki aded Kelâm-ı kadîm iştirâ olunup birer müstahıkkına verile ve yirmi guruş dahi mu‘takam Seher bt. Abdullah nâm hatuna verile deyü huzûr-ı Müslimînde vasiyet ve tenfîzine beni vasiyy-i muhtâr nasb ve ihtiyâr eyleyip musırran alâ-îsâihî fevt olmağla tenfîz-i vesâyâ murâd eylediğimde mezbûre Bağıcinan mâni‘ olur suâl olunsun dedikde gıbbe’s-suâl mezbûre Bağıcinan tereke-i müteveffâ-yı mezbûra vaz‘-ı yedini ikrâr lâkin müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden mahmiye-i mezbûrede Ayasofya-i kebîr mahallesinden İbrahim Çelebi b. Muharrem ve Üsküdar’da Vâlide Sultan mahallesinden Mehmed Ağa b. Hasan li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Macar Hasan Ağa b. Abdullah fevtinden üç gün [mukaddem] hasta ve alîl oldukda bi-emrillâhi te‘âlâ kazâ-i nahb eyledikde cemî‘ malımın sülüsü ifrâz olunup meblağ-ı mefrûz-ı mezbûrdan altmış guruş ile vech-i mesnûn üzere levâzım-ı techîz ve tekfînim görüle ve iki bin bir akçe ile ıskāt-ı salât ve kefâret-i savb ve yemînim oluna ve yirmi guruş ile iki aded Kelâm-ı kadîm iştirâ olunup birer müstahıkkına verile ve yirmi guruşu mu‘takam Seher bt. Abdullah nâm hatuna verile ve fazla kalırsa vücûh-ı birre müdde‘î-i mezbûrun re’yiyle sarf oluna deyü huzûrumuzda ikrâr ve bizi işhâd etti, biz bu husûsa bu vech üzere ilâ-âhirihî. Hurrire fi’t-târîhi’l-mezbûr li-seneti’l [merkūme]. Şâhidûnü’s-sâbikūn