Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 755 Hüküm no: 607 Orijinal metin no: [140b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin vasiyetini yerine getirmek üzere Hasan Beşe’yi vasi tayin ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Uşşâkī Mehmed Efendi mahmiye-i İstanbul’da Altıboğça mahallesinde sâkin iken bundan akdem vefât eden Bakkāl Hüseyin Çelebi b. Hüseyin’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffâ-yı mezbûrun <> mu‘takı râfi‘ü’l-kitâb Hasan Beşe b. Abdullah meclis-i ma‘kūd-ı mezbûrda müteveffâ-yı mezbûrun zevce-i menkûhası olmağla terekesine vaz‘-ı yed edip zâtı mahalle-i mezbûre ahâlîsinden Sinan Efendi b. Ali ve Selim Ağa b. Fazlı ta‘rîfleriyle mu‘arrefe olan İsmihan Hatun bt. Mehmed mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Çelebi b. Hasan b. Mustafa hayâtında hasta ve alîl oldukda bi-emrillâhi te‘âlâ vefât edersem cemî‘ malımdan kırk guruş ifrâz olunup levâzım-ı techîz ve tekfînim ve ıskāt-ı salâtıma ve eyyâm-ı mübârekede tabh-ı ta‘âm ve it‘âm-ı fukarâya harc ü sarf oluna ve sagīre kızım Rukiye ve sagīr oğlum İbrahim’in rüşd-i sedâdına değin mal-ı müntakillerinden zabt u hıfz oluna deyü vasiyet ve tenfîzine beni huzûr-ı Müslimînde vasiyy-i muhtâr nasb ü ta‘yîn eyledikde ben dahi muvâcehesinde kabûl ve musırran-aleyhâ vefât etmekle tenfîz-i vesâyâ murâd eylediğimde mezbûre İsmihan mâni‘a olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden mahalle-i mezbûre sükkânından el-Hâc Yusuf b. Abdullah ve el-Hâc Ali b. Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hüseyin Çelebi b. Hasan b. Mustafa hasta ve alîlen bi-emrillâhi te‘âlâ fevt olduğumda cemî‘ malımdan kırk guruş ifrâz olunup levâzım-ı techîz ve tekfînim ve ıskāt-ı salâtıma ve eyyâm-ı mübârekede tabh-ı ta‘âm ve it‘âm-ı fukarâya sarf oluna ve evlâd-ı sıgārım Rukiye ve İbrahim’in malları zabt oluna deyü huzûrumuzda vasiyet ve tenfîzine işbu müdde‘î-i mezbûr Hüseyin’i vasiyy-i muhtâr nasb ü ta‘yîn eyledikde ol dahi muvâcehesinde kabûl ve musırran-aleyhâ vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hasan b. Abdullah ve Ömer b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fî 6 min-Cumâdelâhire sene 1110. Şuhûdü’l-hâl: el-Hâc Mehmed b. el-Hâc İbrahim, Ahmed Ağa b. el-Hâc Osman, Hasan Çelebi b. Abdullah, Selim Ağa b. Fazlı Bey, el-Hâc Yusuf b. Abdullah