Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 769 Hüküm no: 620 Orijinal metin no: [143a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaycı İbrahim Çelebi’nin Sultan Mehmed Camii İmareti’ne vakfedilen Çanakçı Murad Para Vakfı’na borcu olduğu Mahmiye-i İstanbul’da Kirmasti mahallesi ahâlîsinden olup mahmiye-i mezbûrede Fâtih Sultan Mehmed Hân Câmi‘-i şerîfinin imâretine vakf olunan Çanakçı el-Hâc Murad nâm sâhibü’l-hayrın nukūd-ı mevkūfesine bi’l-fi‘il kāimmakām-ı mütevellî ve vakf-ı mezbûrun câbîsi olan bâ‘isü’l-kitâb İsmail Efendi b. İbrahim mahfil-i kazâda fi’l-asl vilâyet-i Anadolu’da Çağa kazâsına tâbi‘ Saray nâm karye ahâlîsinden olup mahrûse-i Edirne’de Muradiye mahallesinde müsâfiren sâkin iken bundan akdem vefât eden Yaycı İbrahim Çelebi b. Süleyman b. Abdullah’ın terekesini veresesine intikāle vasiyy-i muhtârı olmağla terekesine bi’l-vesâye vaz‘-ı yed eden Usta Yusuf b. Murad mahzarında üzerine da‘vâ ve takrîr-i kelâm edip müteveffâ-yı mezbûr Yaycı İbrahim Çelebi b. Süleyman b. Abdullah’a işbu yedimde olan mu‘anven mersûm deyn temessükü nâtık olduğu üzere bin yüz on senesi Muharremi’nin üçüncü günü mal-ı vakf-ı mezbûrdan on guruş idâne ve teslîm ol dahi istidâne ve kabz ve mesârifine sarfla istihlâk edip hattâ sene-i mezbûrede Edirne’ye gider oldukda cânib-i vakf-ı mezbûra zimmetinde ol kadar guruş deyni olduğunu alâ-tarîk-i ruûsi’l-işhâd ikrâr ve işhâd edip kable’l-edâ fevt olmağla terekesinden taleb ederim suâl olunsun, gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden Camcı Ali mahallesinden Yaycı Süleyman Beşe b. Pîrî ve Samatya’da sâkin Molla Ali b. Mustafa li-ecli’ş-şehâde meclis-i mezbûra hâzırân olup isre’l-istişhâd fi’l-hakīka müteveffâ-yı mezbûr Yaycı İbrahim Çelebi b. Süleyman b. Abdullah târîh-i mezbûrda Edirne’ye gider oldukda Fâtih Sultan Mehmed Hân Câmi‘-i şerîfinin imâretine vakf olunan Çanakçı el-Hâc Murad nâm sâhib-i hayrın nukūdundan cânib-i vakf-ı mezbûra zimmetinde on guruş vâcibü’l-edâ deynim vardır deyü huzûrumuzda ikrâr ve bizi işhâd edip biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd şüd. Fî 11 min-Cumâdelâhire sene 1110. Şuhûdü’l-hâl: Nakkaş İsmail b. Halil, Mehmed Çelebi b. Mustafa, İbrahim Çelebi b. Ahmed, Ahmed Çelebi b. Sefer